Өчигдөр буюу Лхагва гарагт Япон улсын эрүүл мэндийн яам 2023 оны зарим статистик тоо баримтыг танилцуулжээ.
2023 онд 125 гаруй сая хүн амтай тус улсад 727,277 хүүхэд мэндэлсэн нь өмнөх оноосоо 5.6 хувиар буурсан үзүүлэлт төдийгүй энэ төрлийн статистик мэдээллийг боловсруулж эхэлсэн 1899 оноос хойших хамгийн доод түвшин болсон байна.
Энэ нь тус улсын эмэгтэйчүүд амьдралынхаа турш дунджаар 1.2 хүүхэд төрүүлдэг гэсэн үг юм.
Үүнээс гадна 2023 онд Японд өмнөх оноосоо 6 хувиар бага буюу 474,717 хос гэрлэлтээ бүртгүүлсэн нь төрөлтийн тоо буурч байгаагийн гол шалтгаан гэж Японы эрх баригчид үзэж байна.
Хүн ам зүйн асуудал “ноцтой түвшинд хүрсэн”, 2030 он хүртэл ирэх зургаан жилийн хугацааг бууралтыг зогсоох сүүлчийн боломж гэж үзэж байгааг тус улсын засгийн газрын сайд Ёшимаса Хаяаши сэтгүүлчдэд мэдээлжээ.
Өчигдөр Японы парламент хүүхэдтэй гэр бүлүүдийг санхүүгээр дэмжих хуулийн төслийг баталсан юм.
Энэ зорилгод зарцуулах 5.3 их наяд иенийг ($34 тэрбум) засгийн газрын 2024 оны төсөвт тусгасан бол ирэх гурван жилийн хугацаанд жил бүр 3.6 их наядыг зарцуулахаар төлөвлөжээ.
Японы залуу үеийнхэн эдийн засгийн дарамт, хүйсээр ялгаварладаг нийгмийн хандлагын улмаас гэрлэх болон хүүхэдтэй болох сонирхолгүй болсныг судалгаанууд харуулдаг.
Байдал энэ хэвээр үргэлжилбэл тус улсын одоогийн 125 сая гаруй хүн ам 2070 он гэхэд 30 хувиар буурч, 87 саяд хүрэх тооцоо бий.
Үүний 10 хүн тутмын дөрөв нь 65 ба түүнээс дээш настай байх хэтийн төлөв харагдаж байна.
Эх сурвалж: Associated Press
