Эрүүл мэндийн даатгалын үндэсний зөвлөл 2026 онд үйлчилгээний тарифыг 8 хувиар нэмэгдүүлэх шийдвэр гаргалаа. Шинэ тогтоол хууль ёсны бүртгэлтэйгээр хүчин төгөлдөр болно.

УИХ-ын чуулганаар Төрийн байгуулалтын байнгын хорооны даргаар Б.Жавхланг сонгож, Хүний хөгжил, нийгмийн бодлогын байнгын хорооны даргаар П.Ганзоригийг томиллоо. Ардчилсан нам тав хоногийн завсарлага хүсэв.

Авлигатай тэмцэх газраас нийтийн албанд нэр дэвшсэн 5900 гаруй хүний ашиг сонирхлын урьдчилсан мэдүүлгийг хянаж, 53 нэр дэвшигчид илт ашиг сонирхлын зөрчилтэй гэж дүгнэжээ. Ихэнх нь орон нутгийн захиргааны удирдах албан тушаалд нэр дэвшсэн байна.

“Улаанбаатар кабель кар” ОНӨТҮГ дүүжин тээврийн тарифыг 3,000 төгрөгөөр тогтоосноор 2030 оноос ашигтай ажиллах санхүүгийн тооцоог гаргажээ. Тус төсөлд Францын хөнгөлөлттэй зээлээр хөрөнгө оруулалт хийгдэж байна.

Сүхбаатар аймгийн Дарьганга суманд адуунд нийлсэн хуланг Говийн их дархан цаазат газрын хамгаалалтын захиргааны баг Мазаалай шандын нуруунд тээвэрлэн, ижил сүрэгт нь буцаан нийлүүлжээ.

Малайзын Karex Bhd компани Ираны дайнаас үүдэлтэй түүхий эдийн тасалдал үргэлжилбэл бэлгэвчний үнийг 20-30 хувиар өсгөж болзошгүйг мэдэгдэв. Одоогоор түүхий эд хангалттай ч нөхцөл байдал хүндрэх эрсдэлтэй байна.

Улаанбаатар хотын зарим байршилд тавдугаар сарын 18-наас 10 хоногийн хугацаатай халуун усны хэрэглээг хязгаарлаж, дулааны шугамын засвар шинэчлэлийн ажил хийгдэхээр төлөвлөжээ.

Одоогоор 6,500 иргэн эд эс, эрхтний донор болох хүсэлтээ бүртгүүлсэн бөгөөд амьгүй донороос эд эс, эрхтэн шилжүүлэхэд гэр бүлийн гурван гишүүний зөвшөөрөл авах журамтай байна.

Нийслэлийн Монгол Ардын намын хорооны хурал өнөөдөр 09:00 цагт эхэлж, хэлэлцэх асуудлууд тодорхойгүй байна. Хуралд Нийслэлийн МАН-ын дарга Х.Нямбаатарын ажлын талаар хэлэлцэх магадлалтай.

Орон нутгийн нөхөн сонгуулийн зохион байгуулалттай холбогдуулан иргэний шилжилт хөдөлгөөний бүртгэлийг түр зогсоож, нийслэлийн дүүрэг хоорондын шилжилт хэвийн үргэлжилнэ гэж Улсын бүртгэлийн ерөнхий газраас мэдээллээ.