Дөрөвдүгээр сарын 16-ны өглөө автобусны буудлын ойролцоо 15-18 насны хүүхдүүд бүлэглэн Toyota Aqua автомашиныг хутга тулган дээрэмдсэн хэрэг гарчээ. Цагдаагийн байгууллагаас эцэг эхчүүдэд хүүхдийнхээ нөхөрлөлд анхаарахыг зөвлөж байна.

Авлигатай тэмцэх газраас нийтийн албанд нэр дэвшсэн 5900 гаруй хүний ашиг сонирхлын урьдчилсан мэдүүлгийг хянаж, 53 нэр дэвшигчид илт ашиг сонирхлын зөрчилтэй гэж дүгнэжээ. Ихэнх нь орон нутгийн захиргааны удирдах албан тушаалд нэр дэвшсэн байна.

Сүхбаатар аймгийн Дарьганга суманд адуунд нийлсэн хуланг Говийн их дархан цаазат газрын хамгаалалтын захиргааны баг Мазаалай шандын нуруунд тээвэрлэн, ижил сүрэгт нь буцаан нийлүүлжээ.

Улаанбаатар хотын зарим байршилд тавдугаар сарын 18-наас 10 хоногийн хугацаатай халуун усны хэрэглээг хязгаарлаж, дулааны шугамын засвар шинэчлэлийн ажил хийгдэхээр төлөвлөжээ.

Орон нутгийн нөхөн сонгуулийн зохион байгуулалттай холбогдуулан иргэний шилжилт хөдөлгөөний бүртгэлийг түр зогсоож, нийслэлийн дүүрэг хоорондын шилжилт хэвийн үргэлжилнэ гэж Улсын бүртгэлийн ерөнхий газраас мэдээллээ.

Нийслэл хотын нийтийн эзэмшлийн талбайн тохижилт, цэвэрлэгээний ажлын явцад ногоон байгууламжид тамхины иш хаях, явган хүний зам дээр автомашин байрлуулах зэрэг зөрчил түгээмэл илэрч байна. Иргэдийг ухамсартай байж, бүтээн байгуулалтад оролцохыг уриалж байна.

Үндэсний номын баяр энэ жил тавдугаар сарын 15-17-нд Сүхбаатарын талбайд зохион байгуулагдах бөгөөд "Сэтгэл тэжээх 50 ном"-ыг танилцуулах юм.

Авлигатай тэмцэх газрын шалгалтаар “Чингис хаан банк” болон “Капитал банк”-нд холбогдох хохирлыг нөхөн төлүүлэх шийдвэр гарч, нийт 207.7 тэрбум төгрөгийн өрөөс 70 тэрбумыг барагдуулжээ.

Сонгинохайрхан дүүргийн Эмээлт авто замын шалган нэвтрүүлэх цэгээр халиун бугын олон тооны эвэр тээвэрлэхийг завдсан үйлдлийг Экологийн цагдаагийн алба илрүүлж, холбогдох зөвшөөрлийг шалгаж байна.

Баянзүрх дүүргийн прокурорын газраас нийслэлийн дүүрэг дамжин үйлдсэн олон удаагийн хулгай, залилангийн хэрэгт яллах дүгнэлт үйлдэж, шүүх 12 жилийн хорих ял оноож, 911.5 сая төгрөгийн хохирлыг гаргуулан олгохоор шийдвэрлэлээ.