2024 оны дөрөвдүгээр сарын 17-19-нд хүчтэй салхи, шороон шуурганы улмаас 12 барилгын дээвэр хууларч, аймаг, сумдын захиргааны байгууллагууд хохирлыг тогтоож сэргээн засварлах ажил хийж байна.

Улсын дээд шүүх "Ногоон автобусны" хэргийг 27 хүний холбогдолтойгоор хянан хэлэлцэж байна. Хэргийг шалгах явцад 134.5 тэрбум төгрөгийн хохирлоос 58 тэрбумыг нөхөн төлүүлж, үл хөдлөх хөрөнгийг битүүмжилжээ.

Монголын төмөр зам ТӨХК анх удаа өөрийн хөрөнгөөр батлан даан 300 тэрбум төгрөгийн бонд босгож, Багахангай-Хөшигт-Эмээлт чиглэлийн төмөр замын бүтээн байгуулалтад зарцуулах юм.

Хөдөлмөр халамжийн үйлчилгээний ерөнхий газраас энэ сарын хүүхдийн мөнгө, нийгмийн халамжийн тэтгэвэр, тэтгэмж олгох хуваарийг танилцууллаа. Тус хуваарийн дагуу олон төрлийн халамжийн мөнгийг олгоно.

Xоккейн дэлхийн аварга шалгаруулах тэмцээний III дивизионы В хэсгийн тоглолтууд Хонконгт болж, Монголын баг хэсгийн сүүлийн тоглолтод Филиппиний багийг 13-4 оноогоор яллаа. Хэсгийг Узбекистаны баг тэргүүлж, Монгол тавдугаар байрт орсон байна.

Зам, тээврийн сайд Б.Дэлгэрсайхан цахилгаан болон хосолмол автомашины хэрэглээг дэмжиж, дугаарын хязгаарлалтаас чөлөөлөх шийдвэр гаргасан талаар мэдээлэв. Цахилгаан автомашины тоо 2023 онд 1,061-д хүрч, 2026 он гэхэд 20 мянгад хүрэх зорилготой байна.

Нийслэлийн засаг дарга Х.Нямбаатар төрийн албан хаагчдын ажлын цагийг уян хатан зохицуулж, ажил эхлэх, тарах цагийг 07:00-08:30, 16:00-17:30 хооронд тогтоолоо. Энэ нь ачаалал бууруулах, бүтээмж нэмэгдүүлэх зорилготой.

Хустайн байгалийн цогцолбор газарт 350 гаруй тахь тархан нутагшиж, энэ жил анхны төл нь мэндэлжээ. Монголд гурван газар тахь нутагшуулсан байна.

Олон нийтийн сүлжээнд тархаж буй гадаад паспортын загвар шинэчлэгдсэн гэх мэдээлэл ташаа бөгөөд Засгийн газрын 2022 оны тогтоолоор хүчинтэй хугацааг тогтоосон ч загвар өөрчлөгдөөгүйг албан ёсоор мэдээллээ.