Салхи шуурганд барилгын дээвэр хууларсан 12 дуудлага бүртгэгдлээ

2024 оны дөрөвдүгээр сарын 17-19-ний өдрүүдэд нийт нутгаар хүчтэй салхи, цасан болон шороон шуурга шуурч, зарим аймаг, сумдын нутгаар гамшигт үзэгдлийн хэмжээнд хүрсэн байна. Энэхүү салхи шуурганы улмаас барилгын дээвэр хууларсан 12 дуудлага, мэдээлэл бүртгэгдсэн бөгөөд үүнд дөрөв байшин, нэг агуулахын дээвэр оржээ.

Тухайлбал, Баянхонгор аймгийн Галуут суманд дөрөвдүгээр сарын 18-ны өдрийн 16:20 цагийн орчимд 23 метр секундийн хурдтай шороон шуурга шуурсны улмаас сумын Засаг даргын тамгын газрын өвсний агуулахын 10х30 метр хэмжээтэй дээврийн 2х4 метр хэсэг хууларсан байна. Мөн Баянхонгор аймгийн Бөмбөгөр суманд 22-24 метр секундийн хурдтай шороон шуурга шуурсны улмаас Хүүхдийн цэцэрлэгийн Б байрны дээвэр хууларсан бөгөөд Увс аймгийн Хяграс сумын Эрүүл мэндийн төвийн дээвэр мөн хууларсан байна.

Аймаг, сумдын нутгийн захиргааны байгууллагууд хохирлыг тогтоож, сэргээн засварлах арга хэмжээг авч ажиллаж байна. Цаг агаарын энэ аюулт үзэгдлийн улмаас хүний амь нас, эрүүл мэндэд ямар нэгэн хохирол учраагүй гэж мэдээлж байна.