Монгол Улс НҮБ-ын Статистикийн комиссын 2027-2030 оны гишүүнээр сонгогдож, олон улсын статистикийн бодлого боловсруулах үйл явцад идэвхтэй оролцох боломжтой боллоо.

УИХ-ын гишүүн Ч.Лодойсамбуу Монгол Улсын Их Хурлын тухай хуулийн нэмэлт, өөрчлөлтийг хэлэлцэх нь парламентын эрх мэдлийг зөрчиж, улс төрийн зодоон болж байгааг шүүмжиллээ.

Аж үйлдвэр, эрдэс баялгийн сайд Г.Дамдинням ОХУ-ын Элчин сайдтай уулзаж Монгол Улсыг тэсэлгээний бодисын экспортын хоригт оруулахгүй байх талаар тохиролцлоо. Газрын тосны бүтээгдэхүүний нийлүүлэлт таслахгүй байх асуудлыг мөн хэлэлцэв.

Авлигатай тэмцэх газрын мөрдөн шалгах ажиллагаагаар “Ногоон автобусны” хэрэгт 27 хүнийг яллагдагчаар татаж, 134,5 тэрбум төгрөгийн хохирлыг бүрэн нөхөн төлүүлсэн байна. Хэрэг одоогоор Улсын дээд шүүхэд хянагдаж байна.

Хотын дарга Х.Нямбаатар махны үнийн нэмэгдэл болон борлуулалтын цэгийн тоог нэмэх талаар мэдээлэл өглөө. Нөгөөдрөөс үхрийн махны үнэ 3000, хонины махны үнэ 2000 төгрөгөөр нэмэгдэхээр боллоо.

Улаанбаатар хотод болсон боксын Азийн аварга шалгаруулах тэмцээнд Э.Номундарь эмэгтэйчүүдийн -48 кг-ын жинд мөнгөн медаль хүртлээ.

2024 оноос согтуурсан үедээ тээврийн хэрэгсэл жолоодсон болон шалгалтаас зайлсхийсэн үйлдлийг Эрүүгийн хуулиар гэмт хэрэгт тооцож байна. 2026 оны эхний улиралд 134 хүнд холбогдох хэргийг шүүхэд шилжүүлжээ.

Улаанбаатар хотын дүүжин тээврийн төсөлд хоёр шугам баригдаж, гуравдугаар шугамыг Үндэсний цэцэрлэгт хүрээлэнгээс Богд уулыг давах байдлаар төлөвлөж байна. Нэгдүгээр шугамын барилгын ажил үргэлжилж, хоёрдугаар шугамын ТЭЗҮ боловсруулж байна.

Улсын ерөнхий прокурорын газарт 2026 оны эхний улиралд прокурортой холбоотой 170 өргөдөл, гомдол хүлээн авсан бөгөөд үүний 21.7 хувь нь ёс зүйн зөрчилтэй холбоотой байжээ. Энэ хугацаанд 11 прокурорт сахилгын шийтгэл оногдуулсан байна.