Нийгэм

Цасаар шуурч хүйтэрнэ

Зүүн аймгуудын нутгаар өнөөдрөөс цас орж, цасан шуурга шуурч, хүйтэрхийг анхааруулж байна. Шинийн дөрвөнд буюу гуравдугаар сарын 2-нд баруун аймгуудын нутгийн баруун хэсгээр, гуравдугаар сарын 3-нд баруун болон төвийн аймгуудын ихэнх нутаг, зүүн аймгуудын нутгийн хойд хэсгээр, гуравдугаар сарын 4-нд зүүн аймгуудын нутгаар цас орох төлөвтэй байгааг УЦУОШГ-ын мэдээнд дурджээ.

Салхи 3-нд ихэнх нутгаар, 4-нд говь талын нутгаар секундэд 13-15 метр хүрч шороон болон цасан шуурга шуурна. Гуравдугаар сарын 1, 2-нд Увс нуур болон Дархадын хотгор, Идэр, Тэс голын хөндий, Хүрэн бэлчир орчмоор шөнөдөө 25-30 градус, өдөртөө 10-15 градус, Хангай, Хөвсгөл, Хэнтийн уулархаг нутаг, Орхон-Сэлэнгэ, Эг, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 18-23 градус, өдөртөө 5-10 градус, говийн бүс нутгийн өмнөд хэсгээр шөнөдөө 6-11 градус хүйтэн, өдөртөө 4-9 градус дулаан, бусад нутгаар шөнөдөө 13-18 градус, өдөртөө 2 градус дулаанаас 3 градус хүйтэн байна. Гуравдугаар сарын 3-нд баруун болон төвийн нутгаар, гуравдугаар сарын 4-нд ихэнх нутгаар хүйтэрнэ.

Эх сурвалж: УЦУОШГ

Түлхүүр үг

ХОЛБООТОЙ МЭДЭЭ

Сэтгэгдэл

Таны сэтгэгдэл

Back to top button
Close