Бурхан багшийн хоёр их шавийн ариун рэнсрэлүүдийг Гандантэгчэнлин хийдэд 10 хоног заллаа
Гандантэгчэнлин хийдийн хүсэлтээр Энэтхэгийн Соёлын яамны харьяа Энэтхэгийн Үндэсний музей, Мадхья Прадеш мужийн Засгийн газар, Шри Ланкийн Махабодхи нийгэмлэг болон Олон Улсын Буддын Шашны Холбоотой хамтран Бурхан багшийн хоёр их шавь Архант Сарипутра, Архант Маудгальяна нарын ариун рэнсрэлүүдийг 2026 оны 5-р сарын 31-нээс эхлэн 10 хоногийн турш Гандантэгчэнлин хийдэд заллаа.
Ариун рэнсрэлүүдийг Их Дүйчэн Өдөр олон нийтэд нээсэн бөгөөд Ассам мужийн Захирагч Лакшман Прасад Ачарья 2026 оны 5-р сарын 30-нд Монгол Улсын Боловсролын сайд Л. Энх-Амгалан болон Гандантэгчэнлин хийдийн Тэргүүн Их Хамба лам, Хамба Номун Хан, Гэвш Лхаарамба Д.Жавзандорж нарт ёслол төгөлдөр гардуулан өгсөн юм.
2025 оны 10-р сард Монгол Улсын Ерөнхийлөгч Ухнаагийн Хүрэлсүхийн Энэтхэгт хийсэн төрийн айлчлалын үеэр Энэтхэгийн Ерөнхий сайд Нарендра Моди энэхүү арга хэмжээний талаар зарласан бөгөөд Энэтхэг, Монгол хоёр Буддын шашнаар холбогдсон соёл иргэншлийн эртний холбоотой Стратегийн түншүүд юм. Энэхүү 10 хоногийн турш Монголын өнцөг булан бүрээс ирсэн 100,000 орчим сүсэгтэн ариун рэнсрэлүүдэд хүндэтгэл үзүүлэн сүсэглэж адис авлаа.
Эдгээр ариун рэнсрэлүүдийг өмнө нь зөвхөн Тайландад 2024 онд залж байсан бол одоо Монголд авчирч залаж байгаа нь онцгой ач холбогдолтой юм. Мөн 2022 оны 6-р сард Монгол Улсад Бурхан Буддагийн ариун рэнсрэлийг залсан үйл явдал болсон.
Энэтхэгийн Үндэсний музей болон Олон Улсын Буддын Шашны Холбоо Буддын шашны гурван тусгай үзэсгэлэнг зохион байгуулсан бөгөөд эдгээр нь олон нийт, лам хуврагууд болон эрдэмтдээс өндөр үнэлгээ авсан юм. Үүнд: Сарипутра ба Маудгальяна нарын амьдрал, Энэтхэгээс Монгол руу Буддын Дхаммагийн дамжуулалт, мөн Сиддхарта Гаутама буюу Шакьямуни Буддагийн амьдралыг харуулсан үзэсгэлэн орно.
Ариун рэнсрэлүүд нь төрийн тэргүүний статустай бөгөөд 2026 оны 5-р сарын 30-нд Энэтхэгийн Ассам мужийн Захирагч тэргүүтэй төлөөлөгчид тусгай нислэгээр Улаанбаатарт авчирсан бол 6-р сарын 10-нд Ладакхийн Захирагч тэргүүтэй төлөөлөгчид Энэтхэг рүү буцаан авч явлаа. Гандантэгчэнлин хийд дээр угтах, үдэх ёслол зохион байгуулагдсан.
Монгол Улсын Засгийн газар ариун рэнсрэлүүдийг залахад бүх талын дэмжлэг үзүүлсэн бөгөөд шашны талын ажлыг Гандантэгчэнлин хийд хариуцан зохион байгууллаа. 6-р сарын 10-ны хаалтын ёслолд Гандантэгчэнлин хийдийн тэргүүн, Боловсролын сайд, Ладакхийн Захирагч болон бусад төлөөлөгчид Энэтхэгийн Засгийн газар болон Ерөнхий сайд Нарендра Модид талархал илэрхийлсэн юм.
Мөн 6-р сарын 10-нд нисэх онгоцны буудал дээр Энэтхэгийн Элчин сайд Атул Малхари Готсурве Ладакхд модны суулгацыг Захирагчид бэлэглэв.
Энэтхэгийн төлөөлөгчид болон Гандантэгчэнлин хийд ариун рэнсрэлүүдийг Монголд залахад дэмжлэг үзүүлсэнд Энэтхэгийн Элчин сайдын яаманд талархал илэрхийлсэн бөгөөд энэ үйл явдал Энэтхэг, Монголын оюун санааны холбоог бэхжүүлэхэд хувь нэмэр оруулах юм.