Дэлхий даяар сэтгэцийн эмгэгтэй хүмүүсийн тоо 95.5 хувиар өсжээ

Дэлхий даяар 1.2 тэрбум хүн сэтгэцийн эмгэгтэй амьдарч байгаа нь 1990 онтой харьцуулахад 95.5 хувиар өссөн байна. “The Lancet” сэтгүүлд нийтлэгдсэн судалгаагаар түгшүүр болон сэтгэл гутрал хамгийн түгээмэл бөгөөд хамгийн их өссөн эмгэгүүд болохыг тогтоожээ. Түгшүүрийн эмгэг 158 хувь, сэтгэл гутрал 131 хувиар нэмэгдсэн байна.

Covid-19 цар тахал сэтгэцийн эрүүл мэндэд хүчтэй нөлөөлсөн гэж судлаачид дүгнэсэн бөгөөд цар тахлын үеэр сэтгэл гутрал, түгшүүрийн түвшин эрс өссөн ч одоог хүртэл цар тахлын өмнөх хэмжээндээ буцаагүй байна.

Судалгаанд сэтгэцийн эмгэгийн хамгийн өндөр ачаалал 15-19 насныханд илэрсэн нь онцгой анхаарал татаж байна. Өмнө нь ийм оргил үзүүлэлт ихэвчлэн дунд насныханд ажиглагддаг байсан юм.

Мэргэжилтнүүдийн үзэж буйгаар эдийн засгийн тогтворгүй байдал, дайн мөргөлдөөн, хүчирхийлэл, нийгмийн харилцаа суларч буй байдал, эрүүл мэндийн үйлчилгээний хүртээмж зэрэг олон хүчин зүйл сэтгэцийн эрүүл мэндэд сөргөөр нөлөөлж байна. Мөн хүмүүс сэтгэцийн асуудлаа илүү нээлттэй ярьж, оношлуулдаг болсон нь бүртгэгдэж буй тоо өсөхөд нөлөөлсөн гэж тайлбарлажээ.