Нөөцийн махыг Номин, М-Март, Миний дэлгүүрийн 81 салбарт борлуулж эхэллээ

Засгийн газрын тогтоолын дагуу 2026 оны 5 дугаар сарын 20-ны өдөр нийслэлийн төвийн зургаан дүүргийн зургаан худалдааны цэгт нөөцийн махны өргөтгөсөн худалдааг 10:00-18:00 цагийн хооронд зохион байгууллаа. Чойбалсан групп ХХК, Багануур Мах Маркет ХХК, Агро Нэгтгэл Трейд ХХК зэрэг гэрээт аж ахуйн нэгжүүд нийт 3746.2 кг хонины мах, 8822 кг үхрийн мах нийлүүлж, нийт 12.5 тонн махыг иргэдэд борлуулсан байна. Өргөтгөсөн худалдаа хоёр өдрийн хугацаанд үргэлжилж, нийт 26 тонн мах борлуулагджээ.

Нөөцийн махыг сүлжээ дэлгүүрүүдэд хүргэх, түгээлтийн бэлэн байдлыг хангах үүднээс худалдааг зохион байгуулсан бөгөөд өчигдрөөс эхлэн нөөцийн махыг сүлжээ дэлгүүрүүдээр дамжуулан худалдаалж эхэлсэн байна. Гэсэн хэдий ч зарим худалдааны цэгүүдэд махны нийлүүлэлт бүрэн бус хүргэгдсэн тохиолдол гарсан байна.

Хүнс, хөдөө аж ахуйн сайд Ц.Идэрбат Улаанбаатар хотын Захирагчийн ажлын албаны холбогдох албаныхныг оролцуулан аж ахуйн нэгжүүдэд түгээлтийн зохион байгуулалтад онцгой анхаарч, тасралтгүй, цаг алдалгүй гүйцэтгэх үүрэг өгч, хариуцлага алдсан тохиолдолд арга хэмжээ авахыг үүрэг болголоо.

Өнөөдрийн байдлаар Номин, М-Март, Миний дэлгүүр сүлжээний нийт 81 салбарт нөөцийн мах бүрэн хүргэгдэж, борлуулалт хэвийн үргэлжилж байна.

Мөн мэдэгдэлд сүлжээ дэлгүүрүүдийн байршил, салбаруудын нарийвчилсан жагсаалт багтсан бөгөөд тус дэлгүүрүүд нь Баянзүрх, Баянгол, Сүхбаатар, Хан-Уул, Чингэлтэй, Сонгинохайрхан зэрэг дүүргүүдэд байрлаж байна.