Монгол Улсын эдийн засаг 2025 онд 6.8 хувиар өсжээ

Ерөнхий сайд Г.Занданшатар өөрийн албан ёсны цахим хуудсаар дамжуулан Монгол Улсын макро эдийн засгийн гол үзүүлэлтүүд эерэг өсөлттэй гарсныг мэдээллээ. Тэрбээр Үндэсний статистикийн хорооноос 2025 оны нийгэм, эдийн засгийн үзүүлэлтүүдийг нэгтгэж, санхүү эдийн засгийн бүх тоо баримт эцэслэгдэн гарсныг онцлов.

Ерөнхий сайдын хэлснээр, оны эцсийн гүйцэтгэлээр эдийн засаг 6.8 хувийн өсөлттэй гарсан бөгөөд үүний 40 хувь буюу 2.9 хувь нь хөдөө аж ахуйн салбарын өсөлт эзэлж байна. Мөн уул уурхайн салбарын өсөлт дунд Оюутолгойн хувь нэмэр 1.1 хувь байжээ. Эдгээр хоёр салбар эдийн засгийн өсөлтийн гол хөшүүрэг болж байна.

Түүнчлэн Монгол Улсын эдийн засгийн бодит тоо, биет гүйцэтгэл бүх салбарт өссөн байна. Жишээлбэл, аялал жуулчлалын салбарын орлого оны эцсийн гүйцэтгэлээр 700 сая ам.долларт хүрч, гадаад жуулчдын тоо 847.2 мянгад хүрсэн бөгөөд ОХУ-аас ирсэн жуулчдын тоо өнгөрсөн оныхоос 25 хувиар өссөн байна.

ДНБ өссөн, экспорт нэмэгдсэн, гадаад валютын нөөц тэлсэн, төсвийн сахилга бат сайжирсан нь тогтвортой бодлогын бодит үр дүн гэж Ерөнхий сайд тэмдэглэв. Инфляц тогтворжиж, хөрөнгө оруулалтын орчин сайжирсан нь хувийн хэвшлийн идэвхийг нэмэгдүүлж, эдийн засгийн суурь бат бөх байгааг харуулж байна.

Г.Занданшатар морин жилд хурд, тэсвэр, урагшлах эрчийг бэлгэдэж, эдийн засгийн өсөлтийг зөвхөн тоон үзүүлэлтээр бус айл өрхийн орлого, ажлын байр, бүс нутгийн хөгжлөөр илэрхийлэхийг Засгийн газрын зорилт болгосон гэдгийг онцоллоо. Тэрбээр экспортын төрөлжилт, дотоодын үйлдвэрлэл, дэд бүтцийн томоохон төслүүдийг эрчимжүүлж, тогтвортой өсөлтийг хадгалахыг зорьж байгааг дурдав. Эдийн засаг гал морин жилийн онцлогт тохирч, илүү тогтвортой, хүртээмжтэй өсөх болно гэдгийг тэмдэглэв.