Монгол, Хятадын хилийн боомтын асуудал хариуцсан төлөөлөгчдийн ажлын уулзалт болов

Монгол Улсын Хил хамгаалах ерөнхий газрын дарга, хилийн цэргийн командлагч, бригадын генерал Ж.Бямбасүрэн тэргүүтэй төлөөлөгчид 2025 оны 12 дугаар сарын 22-25-ны өдрүүдэд Бүгд Найрамдах Хятад Ард Улсад ажлын айлчлал хийлээ.

Айлчлалын үеэр Монгол, Хятадын хилийн боомтын асуудал хариуцсан Ерөнхий төлөөлөгчдийн хамтын ажиллагааг хэлэлцэн, хил дамнасан бүтээн байгуулалт, хилийн боомтын хүчин чадал, мөн хил орчмын нутаг дэвсгэрт хууль сахиулах, харилцан ажиллагааг гүнзгийрүүлэх талаар санал солилцсон байна.

Талууд цаашдын хамтын ажиллагааны чиглэлээр ажлын уулзалтын протокол байгуулж, уламжлалт нөхөрсөг харилцааг өргөжүүлэн хөгжүүлэх, Монгол Улс, БНХАУ-ын “Иж бүрэн стратегийн түншлэл”-ийн харилцаанд хувь нэмэр оруулахад чиглэсэн ажил хэрэгч уулзалт болсон гэдгийг онцолсон.

Энэхүү ажлын уулзалт нь Монгол, Хятадын хилийн боомтын асуудал хариуцсан Ерөнхий төлөөлөгчдийн “Хилийн боомтын хууль сахиулах хамтын ажиллагааны санамж бичиг”, “Уулзалтын протокол”-ын хүрээнд БНХАУ-ын талд анх удаа зохион байгуулагдсан бөгөөд онцлогтой байлаа.