Сүүлийн жилүүдэд ерөнхий боловсролын сургууль, цэцэрлэгийн элсэлтийг цахимаар явуулж байгаа. Гэхдээ энэ жил цэцэрлэгийн цахим элсэлтийг зохион байгуулахгүй байх тогтоол гарсан байна. Учир нь 2 настай хүүхдийг цэцэрлэгт хамруулахгүй гэх шийдвэр гарсан, үүнтэй холбоотойгоор цахим элсэлт явуулахгүй гэлээ. Харин ЕБС-ийн элсэлтийг нийслэлийн хэмжээнд цахимаар зохион байгуулахаар болжээ.
Мөн уламжлалт бүртгэл буюу биечлэн очиж сургуульдаа бүртгүүлэх боломжтойг хэлж байна. ЕБС-ийн бүртгэл 08 сарын 3-ны өдрөөс эхлэн 08 сарын 28-ны 17 цаг хүртэл үргэлжилнэ. Харин орон нутгийн хүүхдүүд цахимаар бүртгүүлэх боломжгүй гэлээ.
Цахимаар бүртгүүлэхдээ parent.edu.mn систем рүү нэвтрэн бүртгүүлэх юм байна. Ингэхдээ эцэг эх өөрийн мэдээллээ бүртгүүлэхээс гадна хүүхдийнхээ регистрийн дугаарыг оруулж харьяаллын дагуу хамрагдах боломжтой сургуулиудаасаа сонголтоо хийж хүсэлтээ явуулах юм.
Уг цахим бүртгэлд хүсэлт гаргасны дараа 24 цагийн хугацаанд хариу гарна гэлээ. Энэ жилийн хувьд 2014 оны 1 сарын 1-нээс 2014 оны 12 сарын 31-ний өдөр төрсөн хүүхдүүд нэгдүгээр ангид элсэн орох юм.
