Ерөнхийлөгч У.Хүрэлсүх 2026 онд ХБНГУ-д төрийн айлчлал хийнэ

Монгол Улсын Ерөнхийлөгч Ухнаагийн Хүрэлсүх ХБНГУ-ын Ерөнхийлөгч Франк-Вальтер Штайнмайэрийн урилгаар 2026 оны 10 дугаар сарын 19-22-ны өдрүүдэд төрийн айлчлал хийнэ.

Энэхүү төрийн айлчлал нь ХБНГУ-д 14 жилийн дараа зохион байгуулагдаж байгаа бөгөөд Монгол болон Германы боловсролын салбарын хамтын ажиллагааны 100 жилийн ойтой холбогдон явагдах юм.

Төрийн тэргүүнүүд хоёр улсын харилцаа, хамтын ажиллагааг харилцан ашигтай худалдаа, эдийн засаг, боловсрол, шинжлэх ухаан, соёлын салбаруудад өргөжүүлэх асуудлаар албан ёсны хэлэлцээ хийхээр төлөвлөгджээ.

Мөн айлчлалын үеэр “Монгол Улс, ХБНГУ хоорондын Хамтарсан тунхаглал” байгуулж, “Стратегийн түншлэл”-ийг өргөжүүлэн бэхжүүлэх хамтын ажиллагааны тэргүүлэх чиглэлийг тодорхойлохоор байна.

Ерөнхийлөгч нар Берлин хотноо зохион байгуулагдах “Чингис хаан ба Монголчуудын ертөнц” үзэсгэлэнгийн нээлтэд оролцох юм.

Түүнчлэн айлчлалын хүрээнд “Монгол-Германы бизнес форум”, “Монгол-Германы шинжлэх ухааны өдөрлөг”, “Монгол ба монголын дараах үеийн Евроази дахь соёлын солилцоо, байгаль орчин” олон улсын эрдэм шинжилгээний хурал, зохиолч Д.Нацагдоржийн мэндэлсний 120 жилийн ойд зориулсан эрдэм шинжилгээний олон улсын бага хурал болох гэж байна.

ХБНГУ-ын Ерөнхийлөгч 2024 онд Монгол Улсад томилолт хийж, хоёр улсын дипломатын харилцаа тогтоосны 50 жилийн ойг тэмдэглэн, “Стратегийн түншлэл”-ийг бэхжүүлэхээс үзүүлэн харилцааг ахиулсан юм.