Төв банкнуудын алт худалдан авалт нэмэгдэж, оны эцэст үнэ өсөх төлөвтэй
Төв банкнууд алт худалдан авалтаа нэмэгдүүлж байгаа нь оны эцэс гэхэд алтны үнийг өсгөх хандлагатай байна гэж “Goldman Sachs” мэдээлжээ. Тус банкны шинжээчдийн тооцоолсноор 2026 онд төв банкнууд сар бүр дунджаар 60 тонн алт худалдан авах төлөвтэй байна. Энэ нь гуравдугаар сарын байдлаар сүүлийн 12 сарын дундаж худалдан авалт болох 50 тоннтой харьцуулахад өсөлт юм.
“Goldman Sachs”-ийн шинжээчдийн үзэж байгаагаар төв банкнуудын алт худалдан авах сонирхол өндөр хэвээр байгаа бөгөөд геополитикийн эрсдэлүүд нөөцөө төрөлжүүлэх хандлагыг дэмжиж байна. Үүний үр дүнд энэ оны эцэс гэхэд алтны ханш унц нь 5400 ам.доллар хүрэх боломжтой гэж таамаглаж байна. Гэсэн хэдий ч ойрын хугацааны төлөвт болгоомжилсон байр суурьтай байгаа юм.
Шинжээчид мөн хувийн хөрөнгө оруулагчдын хувьд хөрвөх чадвараа нэмэгдүүлэх шаардлага гарвал алт нь бэлэн мөнгө босгоход гол эх үүсвэр болдог гэж анхааруулжээ. Тухайлбал, бодлогын хүүгийн түвшин өндөр байх болон эдийн засгийн өсөлтийн төлөв сулрах зэрэг нөхцөлд хөрөнгө оруулагчид хувьцаагаа их хэмжээгээр борлуулж эхлэх боломжтой гэж үзэж байна.