Монголын жүдочид Казахстаны Их Дуулгад дөрөвдүгээр байр эзэллээ
2024 оны 6 дугаар сарын 8-наас 10-ны өдрүүдэд Казахстан улсад зохион байгуулагдсан Их Дуулга жүдогийн тэмцээнд Монголын баг амжилттай оролцож, медалийн чансаагаар дөрөвдүгээр байрт шалгарлаа.
Тэмцээнд нийт 36 орны 295 тамирчин хүч үзсэн бөгөөд Монголын баг хоёр алт, нэг мөнгө, гурван хүрэл медаль хүртсэн байна. Орос, Франц улс тус бүр гурван алт, Казахстан хоёр алт, Герман, Нидерланд, Узбекистан, Серби улс тус бүр нэг алтан медаль хүртсэн бол нийт 16 улс медаль хүртжээ.
Монголын тамирчдаас эрэгтэйчүүдийн 60 кг-ын жинд Б.Сүхбат алт, эмэгтэйчүүдийн 63 кг-ын жинд Л.Энхрийлэн алт, эмэгтэйчүүдийн 48 кг-ын жинд Г.Наранцэцэг мөнгө, эмэгтэйчүүдийн 52 кг-ын жинд М.Нандин-Эрдэнэ, эмэгтэйчүүдийн +78 кг-ын жинд А.Адьяасүрэн, эрэгтэйчүүдийн 73 кг-ын жинд Л.Анхзаяа хүрэл медаль хүртсэн юм.
Б.Сүхбат энэ тэмцээнд анх удаа түрүүлсэн бол Л.Энхрийлэн Их Дуулга тэмцээнээс хоёр дахь алтаа хүртлээ. Л.Энхрийлэн 2022 оны Улаанбаатарын Их Дуулгаас алтан медаль авсан бөгөөд түүнээс гадна хоёр мөнгө, таван хүрэл медальтай юм.
Их Дуулга цуврал тэмцээний дараагийн удаа 2024 оны зургаадугаар сарын 19-21-нд Улаанбаатар хотод болно. Одоогоор 16 орны 104 тамирчин оролцохоор мэдүүлгээ өгсөн бөгөөд энэ тэмцээн “Лос-Анжелес 2028” зуны олимпын оноо олгох цикл эхлэх учраас оролцогчдын тоо нэмэгдэх төлөвтэй байна. Япон улс оролцохоо баталж, Францын баг олимп, дэлхийн медальтнуудтай бүрэн бүрэлдэхүүнээрээ оролцохоор болжээ.