2026 оны тариалалтын технологийн зөвлөмжийг цаг уурын урьдчилсан мэдээнд үндэслэн боловсруулжээ
Эдийн засаг, хөгжлийн яамны харьяа Ургамал, газар тариалангийн эрдэм шинжилгээний хүрээлэнгээс 2026 оны тариалалтад баримтлах технологийн зөвлөмжийг Монгол орны бүс нутгуудын 5-7 дугаар сарын цаг уурын урьдчилсан мэдээнд үндэслэн боловсруулжээ.
Монгол орны дулааны улирлын цаг агаарын төлөвийг бүс тус бүрээр авч үзсэн нь тариалан эрхлэгчдэд хаврын тариалалтаа төлөвлөхөд чухал ач холбогдолтой юм.
Тариалангийн төв бүсэд 5, 6, 7 дугаар сард олон жилийн дунджаас дулаан, буух тунадасны хэмжээ олон жилийн дундажтай буюу 50-70 мм ба түүнээс дээш байх төлөвтэй байна. Энэ нь агаарын хэт халалтын нөлөөг зөөлрүүлэхэд эерэг нөлөөтэй гэж үзжээ.
Зүүн бүсэд дурдсан саруудад буух тунадасны хэмжээ олон жилийн дунджаас бага бөгөөд сүүлчийн хоёр сард агаарын температур нэмэгдэх төлөвтэй байна. Энэ нь зүүн бүсийн тариалалтын технологид анхаарал хандуулах шаардлагатайг илтгэж байна.
Баруун бүсийн тариалан эрхэлдэг нутгуудад 6 дугаар сард буух тунадасны хэмжээ олон жилийн дунджаас их байх төлөвтэй бөгөөд 7 дугаар сард ойролцоогоор 40 мм тунадас буух нь газар тариаланд таатай нөхцөл үүсгэж байна.
Дэлхий нийтийг хамарсан дулаарлын нөлөөгөөр Монгол орны өвлийн улирлын тунадас нэмэгдэж, хүйтний эрч буурах хандлагатай байгаа ч өвлийн тунадас ууршдаг тул хөрсний чийгийн хангамжид үзүүлэх нөлөө нь хязгаарлагдмал байна. Энэ асуудал нь тариалангийн технологид анхаарах шаардлагатай юм.
Өнгөрсөн жил Сэлэнгэ, Төв аймгуудад 5, 6, 7 дугаар сард бороо ороогүй хэдий ч 12 центнер/га ургац авсан нь боловсруулсан технологи шинжлэх ухааны үндэстэй, түүнийг хэрэгжүүлэх ажил чанартай хийгдсэний үр дүн гэж үзэж болно. Энэ нь сайн технологи цаг уурын эрсдэл, хэт халалт, гангийн хор хохирлыг бууруулж байгааг харуулж байна.