Монголын 3×3 сагсан бөмбөгийн шигшээ баг 2026 оны Азийн аварга шалгаруулах тэмцээнд оролцоно
2026 оны 3×3 сагсан бөмбөгийн улирал албан ёсоор эхэлж байна. Монголын 3×3 сагсан бөмбөгийн шигшээ багийн шинэ улирлын эхлэл ирэх сарын 1-нд Сингапурт зохион байгуулагдах Азийн аварга шалгаруулах тэмцээнээр тавигдана.
Энэхүү тэмцээнд Азийн шилдэг багууд оролцох бөгөөд Монголын эрэгтэй шигшээ баг “А” хэсэгт Тайваньтай багтсан байна. Урьдчилсан шатнаас нэг баг нэмэгдэх юм. Эмэгтэйчүүдийн баг “В” хэсэгт Шинэ Зеландтай багтсан бөгөөд мөн урьдчилсан шатнаас нэг баг нэмэгдэхээр төлөвлөгдсөн байна.
Азийн аварга шалгаруулах тэмцээн нь улирлын эхлэл төдий бус, 2028 оны Лос-Анжелесийн олимпын эрхийн төлөөх өрсөлдөөнд чухал үүрэг гүйцэтгэнэ. 2025 онд Монголын эмэгтэй шигшээ баг Дэлхийн аварга шалгаруулах тэмцээнээс мөнгөн медаль хүртсэн нь Монголын 3×3 сагсан бөмбөгийг дэлхийн тавцанд таниулсан үйл явдал болсон.
Одоогийн байдлаар Монголын эрэгтэй баг Азийн чансааг тэргүүлж, эмэгтэй баг дэд байрт жагсаж байна. 2026 оны Азийн аварга шалгаруулах тэмцээнд оролцох багийн бүрэлдэхүүнийг энэ сарын 24-нд албан ёсоор зарлах юм.