Өмнөд Солонгосын хоёр цаначин хориотой вакс хэрэглэсэн тул олимпоос хасагдав

Өмнөд Солонгосын хоёр цаначин хориотой фторжуулсан вакс ашигласны улмаас богино зайн гүйлтийн цанын уралдаанаас хасагдсан талаар Олон Улсын Цана, Сноубордын Холбоо (FIS) мэдээлэв.

Мягмар гарагт болсон урьдчилсан шатны шалгалтаар Өмнөд Солонгосын тамирчин Хан Дасом, Е Жин нарын цанын улнаас хориглосон фторжуулсан вакс илэрсэн байна.

Фторжуулсан ваксыг 2023 оноос цанын тэмцээнүүдэд ашиглахыг хориглосон бөгөөд энэ нь хүрээлэн буй орчин, хүний эрүүл мэндэд сөрөг нөлөөтэй гэж үздэг.

Энэхүү ваксыг анх дарвуулт завины гулгамтгай чанарыг сайжруулахад ашиглаж байсан бөгөөд 1980-аад оноос өвлийн спортод хэрэглэж эхэлсэн юм.

Фторжуулсан вакс нь байгаль болон хүний биед удаан хугацаагаар хадгалагддаг, мөнхийн химийн бодисын ангилалд багтдаг бөгөөд тамирчдын эрүүл мэндэд сөргөөр нөлөөлдөг гэж үздэг.

FIS 2019 оноос тэмцээнүүдэд фторжуулсан вакс хэрэглэхийг хориглож эхэлсэн бөгөөд 2023-2024 оны улирлаас албан ёсны дүрэмд оруулжээ.

Өмнөд Солонгосын цанын холбооны төлөөлөгчид орон нутгийн хэвлэлд өгсөн ярилцлагадаа “Өмнөх тэмцээнүүдэд ийм бодис илрээгүй. Цаныг үйлдвэрлэсэн газартай зөвлөлдөж алдааг тодруулна” гэж мэдэгджээ.

Тэд Олимпын наадмаас хориотой вакс хэрэглэсэн анхны тамирчид биш бөгөөд өнгөрсөн Даваа гарагт Японы сноубордын тамирчин Шиба Масаки мөн ижил шалтгаанаар тэмцээнээс хасагдсан юм.