Монгол Улсын Үндсэн хуулийн 34 жилийн ой тохиож байна

Монгол Улс 1924 онд анхдугаар Үндсэн хуулиа баталснаас хойш 1940, 1960, 1992 онуудад нийт гурван удаа Үндсэн хуулиа шинэчлэн баталсан түүхтэй.

1980-аад оны сүүлчээс Монгол Улсад өөрчлөлт, шинэчлэлтийн уур амьсгал өрнөж, үүний дагуу 1990 онд Үндсэн хуулийг шинэчлэх ажил эхэлсэн.

БНМАУ-ын Бага Хурлаар хэлэлцсэн Үндсэн хуулийн төслийг хүлээн авсан БНМАУ-ын Ардын Их Хурал 76 хоног хуралдаж, 1992 оны 1 дүгээр сарын 13-ны өдөр ардчилсан шинэ Үндсэн хуулийг оршил, зургаан бүлэг, 70 зүйлтэйгээр баталсан юм.

Энэхүү Үндсэн хуулийн оршилд “хүмүүнлэг, иргэний ардчилсан нийгэм цогцлоон хөгжүүлэхийг эрхэм зорилго болгон тунхагласан” бөгөөд уг хууль хүний жам ёсны эрхийг тэргүүн зэрэгт тавьж, улс төрийн ардчилал, олон ургалч үзэл, эдийн засгийн чөлөөт байдал, төрийн эрх мэдэл хуваарилах, нутгийн өөрөө удирдах ёс, хараат бус, шударга, бие даасан шүүхийн тогтолцоо, Үндсэн хуулийн хяналтын институтийг анх удаа баталгаажуулсан байна.