Улаанбаатар хот хагас коксон шахмал түлшийг хэрэглэж эхэллээ

Нийслэлчүүд энэ халаалтын улиралд Агаарын бохирдлыг бууруулах Үндэсний хорооны дэргэдэх Эрдэмтдийн зөвлөлийн шийдвэрээр хагас кокс буюу хөх нүүрсээр хийсэн шахмал түлшийг хэрэглэж байна. 2026 оноос дотоодод үйлдвэрлэсэн хагас коксон түлш хэрэглэгдэхээр төлөвлөгдсөн байна.

Монгол Улсын Ерөнхий сайд Г.Занданшатар, нийслэлийн Засаг дарга бөгөөд Улаанбаатар хотын Захирагч Х.Нямбаатар болон холбогдох албаныхан Дорноговь аймгийн “Алтанширээт” үйлдвэрлэл, технологийн паркт ажиллаж, нүүрс угаах, баяжуулах үйлдвэр болон коксын үйлдвэрийн төслүүдтэй танилцлаа.

Хотын дарга Х.Нямбаатар хэлэхдээ, Улаанбаатар хот болон бусад 21 аймаг, 330 сумыг цахилгаан, дулааны станцад холбох нь цаг хугацаа, санхүүгийн хувьд боломжгүй тул хагас коксон шахмал түлшний үйлдвэр нэн тэргүүний хэрэгцээтэй байгааг онцлов. Хагас коксон шахмал түлшний хэрэглээ Улаанбаатар хотын агаарын бохирдлыг 30 гаруй хувиар бууруулсан байна.

Мөн энэ сард ЖАЙКА олон улсын байгууллагын мэргэжилтнүүд Улаанбаатар хотын агаарын бохирдлын нарийвчилсан дүн шинжилгээг хийхээр төлөвлөжээ.

Хагас коксон шахмал түлшний үйлдвэрийн хувьд хоёр хувилбар байгаа бөгөөд нэг нь Тендерийн тухай хуульд заасны дагуу үйлдвэрлэл, технологийн парктай 10 дугаар сарын 1-нээс үйлдвэрлэл эхэлсэн гэсэн нөхцөлтэй урьдчилсан худалдан авах гэрээ байгуулах боломжтой юм. Хоёр дахь хувилбар нь “Эрдэнэс Тавантолгой” ХК-тай хамтран Багануурын нүүрсний уурхайг түшиглэн батлагдсан ТЭЗҮ-ийн дагуу санхүүгийн зах зээлээс хөрөнгө босгон үйлдвэр барих боломжтой.

Хотын нүүрсний хэрэглээ жилээс жилд буурч байгаа тул нүүрс пиролизын үйлдвэрт хөрөнгө оруулахын оронд технологийн парктай гэрээ байгуулж, эхэлсэн бүтээн байгуулалтыг үргэлжлүүлэх нь цаг хугацаа хэмнэх ач холбогдолтой гэж тооцоолж байна. Дотооддоо хагас коксон түлш үйлдвэрлэвэл импортоор авснаас хоёр дахин хямд тусна гэж үзэж байна.