Нийслэлийн цагдаагийн газрын Мөрдөн шалгах газрын Халаасны хулгайн гэмт хэрэгтэй тэмцэх хэлтсээс “Улаанбаатар смарт карт” ХХК, Нийслэлийн тээврийн газар, Нийслэлийн нийтийн тээврийн үйлчилгээ эрхэлдэг 18 аж ахуйн нэгж, байгууллагуудын 1226 автобусыг 100 хувь камержуулан тус компаниудад хүлээлгэн өгчээ.
Нийтийн тээврийн хэрэгсэлд суурилуулсан хяналтын камерыг ашиглах журмыг Цагдаагийн ерөнхий газрын дэд бөгөөд Нийслэлийн цагдаагийн газрын дарга, цагдаагийн хурандаа Д.Ядамдорж, Нийслэлийн тээврийн газрын дарга Д.Отгонбаатар нарын 2019 оны тавдугаар сарын 31-ний өдөр баталж үйл ажиллагаандаа хэрэгжүүлэн ажиллаж байгаа юм.
Халаасны хулгайн гэмт хэргийн 18 хувь нь нийтийн тээврийн хэрэгсэлд үйлдэгддэг бөгөөд нэг тээврийн хэрэгсэлд дөрвөн хяналтын камер байршуулсан байна. Энэхүү хяналтын камерын бичлэг 15-30 хоног хадгалагдана. Энэ нь нийтийн тээврийн хэрэгсэлд үйлдэгдэж буй хулгайн гэмт хэргээс урьдчилан сэргийлэх, илрүүлэх, таслан зогсооход бодитой ажил болно гэж үзэж буй.
Цаашид бусад автобус баазуудын нийтийн тээврийн хэрэгслийн хяналтын камерыг онлайнаар болон гар утаснаасаа хянадаг болгох талаар ажиллаж байгаа юм байна.
