Монгол Улсын Үндсэн хуулийн цэц 2019 оны 03 дугаар сарын 13-ны өдөр Эрүүгийн хэрэг хянан шийдвэрлэх тухай хуулийн холбогдох заалтууд нь Монгол Улсын Үндсэн хуулийн заалт зөрчсөн эсэх маргааныг хянан хэлэлцээд “…Эрүүгийн хэрэг хянан шийдвэрлэх тухай хуулийн 39.1 дүгээр зүйлийн 4, 39.9 дүгээр зүйлийн 1 дэх хэсгийн 1.4, 40.8 дугаар зүйлийн 1 дэх хэсгийн 1.4 дэх заалтууд нь Монгол Улсын Үндсэн хуулийн Арванзургадугаар зүйлийн 14, Арванесдүгээр зүйлийн 1 дэх хэсэгт заасныг тус тус зөрчсөн” гэж дүгнэн 01 дугаартай дүгнэлт гаргасан.
УИХ Үндсэн хуулийн цэцийн дүгнэлтийг хүлээн авч, 2019 оны дөрөвдүгээр сарын 25-ны өдрийн хуулиар Эрүүгийн хэрэг хянан шийдвэрлэх тухай хуулийн давж заалдах болон хяналтын шатны шүүхийн “шүүгдэгчийн ялыг хүндрүүлэх” холбогдох заалтуудад өөрчлөлт оруулсан. Өөрөөр хэлбэл давж заалдах болон хяналтын шатны шүүх нь анхан шатны шүүхээс шүүгдэгчид оногдуулсан ялыг хүндрүүлж өөрчлөх эрхтэй байсан бол зөвхөн “хөнгөрүүлж” өөрчлөх эрхтэй болсон юм.
Улсын Ерөнхий Прокурорын газраас хуулийн өөрчлөлттэй холбоотойгоор 2015 оны шинэчлэн найруулсан Эрүүгийн хууль 2017 оны долдугаар сарын 01-нээс хүчин төгөлдөр үйлчилж эхэлснээс хойшхи хугацаанд давж заалдах болон хяналтын шатны шүүхээс ял нь хүндэрч, ялаа эдэлж буй хүмүүст холбогдох хэрэгт Прокурорын дүгнэлт бичиж Улсын дээд шүүхэд хүргүүлсэн гэдгийг УЕПГ-ын Шүүхэд төрийг төлөөлөх хэлтэс мэдээллээ. Ийнхүү 2019 оны зургадугаар сарын 05-ны өдрөөс эхлэн хэргүүдийг хянан хэлэлцэж, ял хүндэрсэн шүүхийн шийдвэрийн заалтыг хүчингүй болгож, шийдвэрт өөрчлөлт оруулж эхэллээ.