Хүмүүс кофе, цай аль алинд нь дуртай боловч ажиллах үедээ ихэвчлэн кофег сонгодог. Кофе нь бүтээмжийг дээшлүүлж, богино хугацаанд ой санамж сайжруулах, тархины үйл ажиллагаа сэргээх нөлөөтэйг баталсан байдаг. Гэвч урт хугацаанд, зохисгүй хэрэглэвэл шингэний дутагдалд орох, нойрны хэмд нөлөөлөх, яс сийрэгжүүлэх, ходоодны үрэвслийг нэмэгдүүлэх зэрэг сөрөг нөлөө үүсгэдэг. Тэгвэл бүтээмжээ дээшлүүлэхийн тулд яагаад цай ууж болохгүй гэж?
Зарим судалгаа цайг эрүүл мэндэд сайн төдийгүй бүтээмжийг дээшлүүлдэг гэж үзэж байна. Тухайлбал, Цай нь тэжээллэг чанартай бөгөөд сонор сэрэмж, анхаарал төвлөрлийг дээшлүүлэгч бодис түлхүү агуулдаг гэнэ. Цайнд тодорхой хэмжээгээр кафейн агуулагддаг ч кофетой харьцуулахад арай бага хэмжээтэй байдаг юм байна. Гэхдээ кофе богино хугацаанд л сэргээх нөлөө үзүүлдэг бол цай таныг илүү удаан эрч хүчтэй байлгаж чадна.
Ногоон, хар, цагаан гээд бүх төрлийн цай үл исэлдүүлэгч бодисоор баялаг тул цусан дахь сахарын хэмжээг бууруулах, бодисын солилцоог сайжруулах ач холбогдолтой. Мөн калоригүй тул жингээ барихад тань тусална. Мөн шүдэндээ анхаарал хандуулдаг бол цайг сонгох нь ухаалаг алхам юм. Учир нь цай шүдийг бактериас хамгаалж, зарим тохиолдолд шүд хорхойтуулагч бактерийг устгадаг аж. Судалгаанаас үзэхэд цай уудаг хүмүүс хүнд нөхцөлд ч тайван байдлаа хадгалж чаддаг байна. Мөн өдөрт тогтмол 3 аяга цай уудаг хүмүүс сэтгэл гутралд орох магадлал огт уудаггүй хүмүүсээс 37 хувиар бага байдаг гэжээ. Түүнчлэн өдөрт зургаагаас дээш аяга цай уудаг хүн зүрхний өвчлөлд нэрвэгдэх магадлал 36 хувиар буурдаг гэсэн байна.
