Дөнгөж сая АНУ-ын ерөнхийлөгч Дональд Трамп тус улсын батлан хамгаалах салбарын тэргүүн Жэймс Мэттисийг албан тушаалаасаа огцорч байгааг зарлалаа. Сириэс цэргээ гаргах болсноо Трамп гэнэт зарласнаас 48 цагийн дараа ийм шийдвэр гарч байна. Генерал Мэттис ирэх оны хоёрдугаар сарын сүүлээр ажлаа хүлээлгэж дуусах гэнэ.
Трамп, Мэттис нарын харилцаа эхнээсээ тийм таатай байгаагүй. Албан тушаалаасаа чөлөөлөгдөх өргөдөлд тэр Трамптай санал нийлдэггүйгээ хэд хэдэн зүйлээр илэрхийлсэн байна. Тухайлбал дэлхий дээр АНУ-ын байр суурь хүчтэй байх нь олон улсын түншлэлээс шууд хамааралтайг тэр хэлжээ. “Бат бэх хэлхээ холбоо бий болгож, холбоотнууддаа хүндэтгэл үзүүлэхгүйгээр бид эрх ашгаа хамгаалж, дэлхийд хүчтэй байж чадахгүй” гэж Мэттис бичсэн байна.
Хэрвээ ингэж чадахгүй бол Орос, Хятад улсууд өөрсдийн авторитар дэглэмийн загварыг дэлхий дахинд хэрэгжүүлнэ гэдгийг тэр анхааруулжээ. Мэттис бас Йемен дэх Ираны эсрэг хүчнүүд, Сирийн Курд дайчдад АНУ тусламж, дэмжлэгээ нэмэгдүүлэх ёстой, Америкийн өмнөд хилд зэвсэгт хүчний алба хаагчдыг байрлуулах шаардлагагүй, трансжендер хүмүүсийг армид алба хаахыг хориглох ёсгүй зэрэг Дональд Трампын бодлогыг эсэргүүцсэн байр сууриа өргөдөлд бичжээ.
Жэймс Мэттисийн оронд хэнийг томилох талаар мэдээлэл одоогоор алга байна. Дональд Трампын багаас саяхан Цагаан ордны тамгын газрын дарга Жон Кэлли явахаар болсон. Эдгээр хүмүүсийн ажлаа өгөх болсон гол шалтгаан нь ерөнхийлөгч Дональд Трамптай үзэл бодол нийлэхгүй байсантай холбоотой гэгддэг.
Эх сурвалж: Quartz
ӨВГӨН ГЕНЕРАЛ ЗӨВ ШИЙДВЭР ГАРГАЖЭЭ