“Оюу толгой”-н цахилгаан станцын асуудал удахгүй шийдэлд хүрэх нь. Монгол Улсын Засгийн газар болон “Рио Тинто” групп хоорондын хэлэлцээ үргэлжилж байгаа бөгөөд 2018 ондоо багтаан дуусгахаар ажиллаж байгаагаа Эрчим хүчний сайд Ц.Даваасүрэн хэллээ. Тэрбээр “Хэлэлцээ удахгүй дуусчихвал “Оюу толгой”-н цахилгаан станцын ажил он гараад эхэлнэ. 2023 онд баригдаж дуусна” гэсэн юм. Манай Засгийн газрын хувьд цахилгаан станцыг Тавантолгойн ордод түшиглэн барих зарчмын шийдэлд хүрсэн.
“Оюу толгой”-н Хөрөнгө оруулалтын гэрээнд зааснаар тус компани Монгол Улсын нутаг дэвсгэрээс эрчим хүчээ авах үүрэг хүлээсэн байдаг ч өнөөг хүртэл цахилгаан станц барих ажил гацсаар ирсэн. Энэ хугацаанд тус компани Өвөрмонголын цахилгаан эрчим хүчний сүлжээнээс эрчим хүчээ хангаж байгаа бөгөөд жилд 120-140 сая ам.доллар зарцуулж буй. Хэрэв цахилгаан станцаа барьчихвал энэ мөнгө Монгол Улсад үлдэх юм гэв.
