Туркийн Гадаад хэргийн яамнаас Монголын Элчинг дуудаж, ФЕТО байгууллагын тухай анхааруулжээ

Өнгөрсөн баасан гаригт Бүгд Найрамдах Турк Улсын иргэн Вейсел Акчайг “хулгайлсан” хэрэг мандсантай холбогдуулан тус улсын Гадаад хэргийн яамнаас Анкара дахь Монгол Улсын Элчин сайдыг дуудан уулзжээ.

Мөн Туркийн Гадаад хэргийн яамны хэвлэлийн төлөөлөгч Хами Аксой Монгол Улсад оршин байгаа ФЕТО байгууллагатай холбоотой мэдээлэл бүхий захидал ирүүлсэн байна.

Тус захидалд “ФЕТО террорист байгууллага нь Монгол Улсад өргөн цар хүрээг хамарсан үйл ажиллагаа явуулдаг төдийгүй Монгол Улсын үндэсний аюулгүй байдалд заналхийлсэн террорист бүтэц юм. Бид уг террорист байгууллагатай холбоотой Турк Улсын болгоомжлол болон цаашид гарч болох үр дагавар, хүлээлтийг Монголын талын эрх баригчидтай байнга хуваалцсаар ирсэн билээ.

ФЕТО байгууллагын гишүүдийг шударга шүүхийн өмнө шүүх нь бидний хувьд зүй ёсны хүлээлт юм. Харин Монгол Улсын зүгээс уг байгууллагын эсрэг чухам ямар арга хэмжээ авах нь Монгол Улсын Засгийн газрын эрх юм. Турк Улс нь бусад улсын дотоодын аюулгүй байдлын төлөө авч хэрэгжүүлж байгаа арга хэмжээнд хөндлөнгөөс оролцдог улс биш.

Тиймээс ч өнгөрсөн долоо хоногийн баасан гарагт Монгол Улсад болсон үйл явдлыг хүн хулгайлах үйл ажиллагаа хэмээн нэрийдэж байгаад БНТУ гүнээ харамсаж, эдгээр үндэслэлгүй мэдээллүүдийг эрс няцааж байна.

Туркийн Гадаад хэргийн яам Анкара дахь Монгол Улсын Элчин сайдыг дуудаж уулзсан бөгөөд Турк Улс өөрийн байр сууриа илэрхийлж, Монголын талын эрх баригчдын хандлагыг хүчтэй эсэргүүцэж байна.

Иймд ФЕТО байгууллагын Монгол Улсад явуулж буй худал мэдээлэл түгээх, олон нийтийг санаатайгаар төөрөгдүүлж, улмаар олон нийтэд нөлөөлөх үйл ажиллагаа нь нөхөрсөг монголын ард түмэнд аюулын харанга дэлдэж байгаа явдал хэмээн үзэж байна.

ФЕТО террорист байгууллага болон түүний Монгол дахь тархалтыг зогсоох шаардлагатай арга хэмжээг Монголын эрх баригчид авна гэдэгт найдаж байна” гэжээ.