Сөүлийн төвийн дүүргийн шүүхээс БНСУ-ын экс Ерөнхийлөгч Пак Кын Хэгийн дотны найз Чой Сун Сильд авлигын хэргээр 20 жилийн ял оноолоо. “Yonhap” агентлагийн мэдээлснээр түүнчлэн түүнд 16.6 сая ам.долларын торгууль ногдуулсан байна.
Чой Сун Силь нь Өмнөд Солонгосын засаглалын дээд түвшнийхний дундах авлигын хэрэгт сэжиглэгдэж буй гол хүмүүсийн нэг билээ. Тэрбээр төрийн алба хашиж байгаагүй мөртлөө улс төрийн чухал хэргүүдэд оролцож байсан аж. Түүнчлэн тэрбээр өөрийнхөө хариуцдаг “Mir”, “K-Sports” сангаараа дамжуулан хэд хэдэн компаниас 72 сая ам.долларын хандив авсан нь илэрчээ. Чхве Сун Силийг 2016 оны арваннэгдүгээр сард баривчилсан юм.
