Монголчууд бидний шимтэн үзэх дуртай “Монгол тулгатны 100 эрхэм” нэвтрүүлгийн ээлжит зочноор Дархан аварга, гавьяат тамирчин, Хөдөлмөрийн баатар Б.Бат-Эрдэнэ уригджээ.
Хэнтий аймгийн Өмнөдэлгэр сумын харьяат тэрбээр улсын наадамд 11 удаа түрүүлж, нэг үзүүрлэн, завсаргүй 22 удаа шөвгөрсөн хүчтэн. Мөн жүдо бөхийн Азийн наадмын хошой мөнгө, самбогийн дэлхийн гурав, сонирхогчийн сүмогийн дэлхийн хоёр удаагийн аварга. Өдгөө 53 настай аварга маань 2004 оноос хойш УИХ-ын гишүүнээр сонгогдон, төр түшилцэж байгаа бөгөөд 2016 оны долдугаар сараас эхлэн Батлан хамгаалахын сайдаар ажиллаж байна.
