Б.Гарамгайбаатар: Хэргийг прокурорт шилжүүлнэ гэж надад мэдэгдээгүй

Өчигдөр (2017.09.25) АТГ мэдээлэл хийж УИХ-ын гишүүн асан Б.Гарамгайбаатар болон Эдийн засгийн хөгжлийн сайд асан Н.Батбаяр нарт Эрүүгийн хэрэг үүсгэж яллагдагчаар татах саналыг энэ долоо хоногт Нийслэлийн прокурорын газарт хүргүүлэхээр болсон талаар мэдээлсэн. Энэ талаар Б.Гарамгайбаатар болон Н.Батбаяр нараас тодруулахаар тэдний утсанд холбогдлоо. Одоогоор тэд эх орондоо байгаа аж. Н.Батбаяр утасны дуудлага хүлээн авсангүй. Харин Б.Гарамгайбаатар хоёр асуултад хариу өгөв.

-Сайн байна уу Та. Мэдээ мэдээллийн updown.mn сайтаас ярьж байна. Өчигдөр АТГ Эдийн засгийн хөгжлийн сайд асан Н.Батбаяр болон танд холбогдох хэргийг шалгаад Эрүүгийн хэрэг үүсгэн яллагдагчаар татаж саналыг Нийслэлийн прокурорт хүргүүлэхээр болсон тухай мэдээлсэн. Танд энэ тухай мэдэгдсэн зүйл бий юу. Ямар нэгэн мэдээлэл байна уу?

-Мэдэхгүй, надад мэдээлэл байхгүй байна.

-Эрүүгийн хэрэгт яллагдагчаар татсан, прокурорт шилжүүлж байна гэдэг талаар АТГ танд мэдэгдээгүй юм уу?

-Надад мэдэгдээгүй.

Мөн АТГ өчигдөр Төмөр замтай холбоотой хэргүүд дээр Нийслэлийн Прокурорын газраас мэдээлэл өгсөн. Төмөр замтай холбоотой хэргээр Зам Тээврийн сайд асан А.Гансүх, Солонгосын Самсунг компанийн холбогдох хүмүүсийг шүүхэд шилжүүлсэн байгаа. Одоо Монголын төмөр замын гүйцэтгэх захирал Б.Батзаяа нарт холбогдох хэргийг тусгаарлан, мөрдөн байцаалтын ажил явуулж байгаа. Мөрдөн байцаалтын ажиллагаа тасралтгүй явагдаж байна.

Монгол банкны Ерөнхийлөгч асан Н.Золжаргалд эрүүгийн хэрэг үүсгэн мэдүүлэг авч байгаа. Тэрбээр Монголбанкны ерөнхийлөгчөөр ажиллах хугацаандаа 0.85 хувийн хүүтэй зээлийг хэд хэдэн аж ахуйн нэгжид олгосон болохыг УИХ-ын Эдийн засгийн байнгын хорооноос томилогдсон ажлын хэсэг Монгол банкинд санхүүгийн шалгалт хийх үеэр ил болгосон зэрэг нарийвчлан шалгах шаардлагатай.

Харин 60 тэрбум гэх тодотголтой энэ хэрэг дээр ЦЕГ, ТЕГ болон манайхаас хамтарсан ажлын хэсэг байгуулагдаж ажилласан. Ажлын хэсгүүд өөр өөрсдийн мөрдөн шалгах ажлыг хийж нийслэлийн Прокурорын газарт хянуулахаар хүргүүлсэн. Нийслэлийн Прокурорын газраас тус хэргийн материалуудыг хянаад шийдвэрийг гаргасан. Тиймээс дэлгэрэнгүй мэдээлэл нийслэлийн Прокурорын газраас өгөгдсөн байгаа.

Оффшор бүсийн тухайд тэнд хамаарах асуудлаар хэрэг нээгдчихсэн явж буй учраас эрүүгийн хэрэг хянан шийдвэрлэх хуулийн дагуу прокуророос зөвшөөрөл авсны үндсэн дээр иргэдийн тухай мэдээллийг өгнө. Гэхдээ энэ талаарх мэдээлэл нь аль хэдийн нийтэд зарлагдсан. 2016 оны дөрөвдүгээр сарын 3-нд Олон Улсын сэтгүүлчдийн консорциумаас мэдээлсэн байгаа. Энэ дагуу одоо хэрэг шалгагдаж байна.

АТГ гэмт хэргийн хохирол шийдвэрлэх, нөхөн төлүүлэх, хөрөнгө битүүмжлэх ажиллагааг тасралтгүй явуулж байна. Өнгөрсөн онд нийт 32 тэрбум төгрөгийн хохиролтой хэрэгт мөрдөн байцаалтын ажиллагаа явуулж байсан бол энэ жил есдүгээр сарын байдлаар нийт 34 тэрбум төгрөгийн хохиролтой хэрэгт мөрдөн байцаалтын ажиллагаа явуулж байна. Үүнээс бид 3.1 тэрбум төгрөгийн хохирлыг нөхөн төлүүлж, 15.6 тэрбум төгрөгийн эд хөрөнгийг битүүмжилж хамгаалж ажилласан гэсэн мэдээллийг өгөөд байна.