Х.Тамир: Багшийн мэргэжлээр элсэх босго оноог 500 болгоно

Энэ үеэр БШУЯ-ны дээд боловсролын бодлого зохицуулалтын газрын дарга Х.Тамир багш боловсролын шинэчлэлийн гурван тулгуурт бодлогын талаар танилцууллаа.

Тодруулбал уг гурван тулгуурт бодлогод багш бэлтгэх, багшийн мэргэжлийн тасралтгүй хөгжлийг хангах тогтолцоо болон багшийн нийгмийн баталгаа, цалин, үнэлэмж, нэр хүндийн асуудал орж байгаа аж.

БШУЯ-ны дээд боловсролын бодлого зохицуулалтын газрын дарга Х.Тамирын уг бодлогын талаар танилцуулсан зүйлсээс онцолбол:

Багшийн стандартыг шинэчлэн батлах ажил явагдаж байгаа. Төгсөөд гарч байгаа багш ямар мэдлэг, чадвар, хандлага, төлөвшилтэй хүн байхыг тодорхой болгож байна.

Багшийн эрэлтэд суурилсан элсэлтийн хяналтын тоог тогтоох ажлыг хийхгүй бол зарим чиглэлийн багш илүүдэлтэй бэлтгэгдэж байна.

Багшийн сургалтын хөтөлбөрийг шинэчилж хувьсаж буй боловсролтой уялдуулан сургалтын олон талт шийдлийг ашиглах хэрэгтэй байна.

Хэмжих үнэлгээний тогтолцоог шинэ шатанд гаргахгүй бол багш бэлтгэж буй сургууль болгоны үнэлгээгээр бидний шаардлагад нийцсэн багш бэлтгэгдэж гарч байна уу гэдэг нь эргэлзээтэй байна.

Багш мэргэжлээр суралцах оюутнуудад тэтгэлэг олгоход багшаар элсэх босго оноог нэмэгдүүлэх шаардлагатай байна. Сургуулийн өмнөх боловсрол болон хөгжмийн боловсролоос бусад багш нарт 500-аас эхэлж босго оноог тогтоож байж цаашлаад чанартай элсэгчдэд тэтгэлэг олгох боломжтой болно. Түүнчлэн багш мэргэжлээр суралцаж буй оюутныг төрөөс санхүүжүүлсэн тохиолдолд голч дүнгээс хамаарч үргэлжлүүлэх эсэхийг шийднэ. Мөн төгсөөд багшлах нөхцөлтэй байна. Төрийн мөнгөөр сурчхаад төгсөөд өөр мэргэжлээр ажиллаад байж болохгүй.

Багш гурван жил тутамд мэргэжлийн ур чадвараа үнэлүүлж, багшийн хөгжлийг дэмжих сургалт үйл ажиллагаанд хамрагдана. Үүнд санхүүгийн дэмжлэг үзүүлэх зохицуулалт байгаа. Шинэ зохион байгуулалтаар багш өөрийнхөө хэрэгцээндээ суурилж сурдаг болсон. Мөн зөвхөн багшлах арга зүйгээс гадна өөрийнхөө заадаг хичээлийн чиглэлээр гүнзгийрүүлэн суралцах зохицуулалт байгаа.

Багшаар олон төрлийн ажил хийлгүүлж байгаа нь үндсэн ажлаа хийхэд цаг хүрэлцэхгүй байна гэх асуудлын хүрээнд багш Боловсролын болон Хөдөлмөрийн хуульд заасан бусад чиг үүргийг гүйцэтгэхгүй гэсэн хуулийн зохицуулалттай болсон.

Орон нутгийн захиалгаар болон өөрийн хүсэлтээр гурваас доошгүй жил мэргэжлээрээ ажиллах гэрээ байгуулсан багшид төрөөс дэмжлэг үзүүлнэ. Сум, баг, тосгонд багшилж байгаа багш нарт эхний таван жил болон дараагийн гурван жил тутамд нэг удаа зургаан сарын үндсэн цалинтай тэнцэх хэмжээний мөнгөн тэтгэмж авах.

Багшийн амьдрах нөхцөлөө сайжруулах, орон сууцжуулахад төрөөс дэмжлэг үзүүлэх.

Төрийн болон орон нутгийн цэцэрлэг сургуульд 15-аас доошгүй жил тасралтгүй ажилласан багшийн нэг хүүхдийг тэргүүлэх болон эрэлттэй мэргэжлийн чиглэлээр төрийн өмчийн дээд боловсролын сургуульд үнэ төлбөргүй суралцуулах. 2024 оноос эхэлж хэрэгжинэ.

Өнөөдрийн байдлаар багш бэлтгэж байгаа 31 сургууль, 267 багш бэлтгэх хөтөлбөр байгаа юм байна. Харин багш бэлтгэх магадлан итгэмжлэл хийлгүүлсэн 50 хөтөлбөр байгаа бөгөөд төрөөс багшаар суралцах оюутанд сургалтын төлбөрийн дэмжлэг үзүүлэхдээ уг 50 хөтөлбөрт л олгох юм байна.

Урьдчилсан байдлаар энэ жил багш мэргэжлээр суралцахаар элсэж буй 3,400 оюутан байгаа аж. Харин энэ жил багшаар төгсөх 2,385 суралцагч байгаа юм байна.