Шударгаар тогтмол төлж буй иргэн болон нөхөн шимтгэл төлсөн иргэн гээд даатгуулагч нарын хооронд шударга бус байдлыг бий болгож байна. Иймээс нөхөн шимтгэлийг хориглоно гэж ХНХЯ-ны Төрийн нарийн бичгийн даргыг орлон гүйцэтгэгч А.Хишигбаяр хэллээ.
УИХ-аар Нийгмийн даатгалын багц хуулийн төслийг хэлэлцэж буй. Тус хуульд ямар гол өөрчлөлтүүдийг тусгасан талаар ХНХЯ-ны Төрийн нарийн бичгийн даргыг орлон гүйцэтгэгч А.Хишигбаяр мэдээлэл өглөө.
Хуульд нийгмийн даатгалын шимтгэл төлсөн даатгуулагч олон эх үүсвэрээс тэтгэвэр авдаг байх ёстой гэж үзэн Хувийн тэтгэврийн хуулийн төслийг Нийгмийн даатгалын багц хуульд оруулсан гэдгийг онцоллоо.
Мөн нэрийн дансыг мөнгөжүүлэх, иргэдийн нийгмийн даатгалын шимтгэлийн хоёр хувийг бэлэн мөнгө болгон хадгалж, цаашид ипотекийн зээл, эрүүл мэндийн үзлэг, сургалтын төлбөрт зарцуулах боломжийг олгоно. 2030 оноос тус мөнгөжүүлсэн орлогыг өвлүүлэх боломжийг олгох юм байна.
