Өнгөрсөн баасан гарагт нийслэлд ТЭГ зогсолт хийлээ. Үүнээс үүдэн иргэд нийгмийн сүлжээнд ТҮГЖРЭЛИЙН хэмээн албан бус нэртэй Хот хариуцсан сайд Ж.Сүхбаатарыг “эрэн сурвалжилж эхэлсэн юм. Тэгвэл тэрбээр өөрийн нийгмийн сүлжээндээ түгжрэлийг хэрхэн бууруулах талаар байр сууриа илэрхийлсэн байна.
Түүний зүгээс “Архаг түгжрэл өнөөдөр гэнэт бий болоогүй 20-30 жилийн хугацаанд ужгирч бүрэлдсэн. Позитив талаасаа эдийн засгийн өсөлт, хүн амын төвлөрөлтэй холбоотой. Негатив талаас хот нэгдсэн төлөвлөлтгүй, газрын авлига, замын сүлжээ бага, нийтийн тээврийн уналт, удирдлагын чадамжгүй байдал нөлөөлсөн.
Архаг түгжрэлийг нэг өвлийн хугацаанд бууруулах үндсэн 2 арга зам бий.
Иргэд, албан тушаалтнууд бүгд сайн дураар идэвх санаачлагатай өөрийн чадах хувь нэмрээ оруулах;
тодорхой хугацаанд машины тоог дугаарын хязгаарлалт /албадлага/ зэрэг захиргааны аргаар зохицуулах.
Засгийн газрын гишүүнээр ажилласнаас хойших 2 сарын хугацаанд бодлогоо бид ингэж томьёолсон. Ямартай ч нийтийн тээврийг сэргээх нь гол зорилт, замын хөдөлгөөний танхайралтай тэмцэх нийтийн сэдлийг идэвхжүүлэх шийдвэр гаргах түвшинд болон олон нийтийн дунд ойлгуулахад өмнөхөөс ахиц гарсан…
Түгжрэлийг бууруулах дунд урт хугацааны үндсэн бодлого нь төвлөрлийг сааруулах нэгдсэн бодлогын хүрээнд, хот төлөвлөлтийг сайн хийж мөрдүүлэх; нийтийн тээврийн парк, зохион байгуулалт, үйлчилгээг шинэчлэх, авто замын сүлжээг оновчтой нэмэгдүүлэх замын /зорчилт/ хөдөлгөөний ухаалаг зохицуулалт зохион байгуулалтыг бий болгох, замын хөдөлгөөний танхайралтай тэмцэн, соёлыг дээшлүүлэх, түгжрэлийн талаарх олон нийтийн зохистой хандлагын өөрчлөлтийг дэмжих, түгжрэлийн эсрэг эдийн засгийн хөшүүрэг бүхий хууль зүйн зохицуулалтын орчин бүрдүүлэх…
Л.Оюун-Эрдэнийн тэргүүлсэн Засгийн газар Нийтийн тээврийн салбарыг 2023 онд тогтворжуулан сэргээх зорилт тавьсан байгаа. Ингэснээр өнгөрсөн болон одоогийн өвлийн давтагддаг түгжрэлийн зовлонг сонголттой тээврийн хүчээр зөөллөх боломжтой болно. Нийтийн тээврийн салбар дөнгөн данган аргацаасан байдалд орсон байхад бид дараа дараачийн ямар ч том арга хэмжээнүүдийг авах боломж хязгаарлагдмал болчхоод байгаа юм.
Миний хувьд нийтийн тээвэрт онцгой ач холбогдол өгч байгаа. Хот өөрөө дийлэхээргүй орхигдож… Түгжрэлийн эсрэг гол бодлого, чиглэлээ бид гаргачихсан. Мэдээж судлах зүйлүүд бий. Гол нь Үндэсний хороо ажлаа дөнгөж эхлээд явж бхад бодит үр дүн хаана бна гэх нь өрөөсгөл. Хавар үрээ тариад намар хураахад хугацаа ордог шиг бид хийж буй тодорхой ажлынхаа үр дүнг 1 жилийн дараа харна” гэжээ.
