Германы экстрем спортын тамирчин Гийдо Кунзе аяллынхаа зургаа дахь өдөр Улаанбаатар хотод ирэв

Холбооны Бүгд Найрамдах Герман Улсын экстрем спортын тамирчин Гийдо Кунзе нь Гиннесийн дээд амжилтыг шинээр тогтоох зорилгоор Монгол орны баруун хязгаараас зүүн хил хүртэл 2,600 км замд дугуйн аялал хийхээр төлөвлөжээ.

Тэрбээр уг аяллынхаа зургаа дахь өдөртэй золгож буй бөгөөд өдөрт 350-400 км замыг туулсаар өнөөдөр Улаанбаатар хотод ирээд байна.

Гиннесийн олон дээд амжилтын эзэн болсон тухайн тамирчныг Улаанбаатар хотод саатах үеэр УИХ-ын гишүүн, Монголын дугуйн холбооны дэд ерөнхийлөгч Ц.Мөнхцэцэг, БОАЖ-ын сайд Б.Бат-Эрдэнэ, Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө нар уулзаж, амжилт хүсэв.

Нийслэлийн Засаг даргын орлогч З.Төмөртөмөө “Дэлхийд алдартай хүмүүс олон дагагч, шүтэн бишрэгчтэй учраас тэднийг Монгол Улсад аялж, зочлох үеэр дэмжин ажиллах нь зүйтэй. Ингэснээр тэдний сувгаар дамжуулан дэлхий дахинд эх орноо сурталчилж, үзэсгэлэнт байгалиа үзүүлэх боломжтой. Энэ нь цаашлаад аялал жуулчлалыг хөгжүүлэхэд хувь нэмэр оруулна” гэсэн юм.

Экстрем спортын тамирчин Гийдо Кунзе “Том газар нутагтай, цөөн хүн амтай Монгол Улсад анх удаа ирлээ. Монголчууд найрсаг хүмүүс байна. Монгол, Герман хоёр улсын хооронд олон ялгаа бий ч аяллынхаа үеэр хоёр улс юун дээр хамтарч ажиллаж болох талаар их зүйл анзаарч харлаа” хэмээн сэтгэгдлээ хуваалцлаа.

ХБНГУ-ын Шпаркассэ банкны Олон улсын хамтын ажиллагааны сангийн суурин төлөөлөгч Маркус Лох “Уг аяллын үеэр Боролдой студитэй хамтран Монгол орны тухай баримтат кино хийж байгаа бөгөөд дуусмагц нь нийслэлийн удирдлагууд болон Байгаль орчин, аялал жуулчлалын яаманд хүлээлгэж өгнө” гэдгийг тодотгож байв.

Гийдо Кунзе нь 1965 онд төрсөн бөгөөд 2005 онд автомашины бизнесээ орхин дугуйн экстрем спортоор дэлхийн дээд амжилтыг эвдэхээр шийджээ. Тэрбээр дэлхийн хэд хэдэн дээд амжилтыг эзэмшдэг байна. Тухайлбал,

Австралийн баруун хязгаараас зүүн хязгаар хүртэлх 4200 км замыг хамгийн богино хугацаанд туулсан.
Дэлхийн хамгийн өндөр галт уул болох Чилийн Атакама цөл дэх Ожо де Саладо галт уул хүртэл 6,233 метрийн өндөрт дугуйгаар гарсан.
Альпийн нурууг 100 мянган босоо метрийг 14 хоногийн дотор туулсан.
Хятадын Цагаан хэрэм дээр дугуйгаар хамгийн хол зайд явсан байна.

Монгол Улсад хийж буй түүний аяллын маршрут нь Гараа – Боршоо хилийн боомт, Увс аймгийн Улаангом сум, Архангай аймгийн Цэцэрлэг хот, Улаанбаатар хот, Багануур дүүрэг, Сүхбаатар аймгийн Баруун-Урт хот, Бариа–Бичигтийн боомт орох төлөвлөгөөтэй аж.

Эх сурвалж: Нийслэлийн сургалт, судалгаа, олон нийттэй харилцах газар