Шинэхэн Хөдөлмөрийн баатар

Монгол Улсын Чөлөөт бөхийн эмэгтэй шигшээ багийн тамирчин Олимпийн хүрэл, Дэлхийн хошой алтан медальт, Юниварсад наадмын алтан медальт С.Батцэцэг Монгол Улсын Ерөнхийлөгчийн зарлигаар өнгөрсөн сарын 31-нд Хөдөлмөрийн баатар цол хүртсэн билээ.

Шинэхэн Хөдөлмөрийн баатрынхаа тухай сонирхолтой баримтуудыг түүвэрлэн авч хүргэж байна.

С.Батцэцэгийн хувьд 1990 оны гуравдугаар сарын 11-нд төрсөн, өдгөө 27 настай.
Архангай аймгийн Хашаат сумаар овоглож явдаг тэрбээр таван хүүхэдтэй айлын дөрөв дэх нь.
2008 онд Хашаат сумын дунд сургуулийг дүүргээд МУИС-ийн япон хэлний ангид элсэн суралцжээ.
2005 оноос буюу 15 настайгаасаа сумынхаа Дондов багшийн удирдлаганд чөлөөт бөхөөр хичээллэж эхэлсэн байна.
Тэрбээр эмнэлэгт хоолойн махаа авахуулахаар хэвтэж байхдаа зурагтаар Монголд Оюутны ДАШТ болж байгааг хажуугийн өрөөний зурагтаар хаалганых нь завсраар шагайн байж үзээд л чөлөөт бөхөд дурласан гэдэг.
2008 оноос “Замчин” клубт Дүвчин багшийн шавь болж, 2012 онд “Хилчин” спорт хороонд харьяалагдаж байна.
2008 оноос З.Дүвчин, Т.Сүхбаатар дасгалжуулагчтай улсын шигшээ багт багтсан.
Гэр бүлийн тухайд гэрлэсэн. Нөхөр нь хувиараа бизнес эрхэлдэг гэнэ.
Аав нь тэмцээнийг нь зурагтаар үзэж чадахгүй, ээжээр нь яриулдаг гэсэн шүү.
2015 онд дэд хурандаа цол хүртжээ.
Түүний амжилтаас цухас дурдахад 2005 оны Өсвөр үеийн УАШТ-ээс мөнгөн медаль, 2007 онд Тайванийн Тайчид болсон Өсвөр үеийн ААШТ-ээс мөнгөн медаль, 2008 оны Залуучуудын УАШТ-ээс алтан медаль, 2008 онд Катарын Дохад болсон Залуучуудын ААШТ-ээс мөнгөн медаль, 2009, 2010 онд Насанд хүрэгчдийн УАШТ-ий алтан медаль, 2011 онд мөнгөн медаль, 2010 онд Энэтхэгийн Шинэ Делид болсон ААШТ-ээс мөнгөн медаль, 2009 оны ДАШТ-д орсон, 2010 оны ДАШТ-д алтан медаль, 2012 оны олимпод хүрэл медаль хүртсэн. Ийнхүү тэрбээр зуны Олимпоос чөлөөтийнхний 32 жил тасарсан медалийн буухиаг үргэлжлүүлсэн нэгэн юм. 2015 оны ДАШТ-д дахин алтан медаль хүртэн дэлхийн хошой аварга болсон аж. 2017 оны Азийн аварга.
С.Батцэцэгийн хувьд 2010 онд Монгол Улсын гавьяат тамирчин болж, хэдхэн хоногийн өмнө Монгол Улсын Хөдөлмөрийн баатар цолоор энгэрээ мялаасан байна.