Хятад батлан хамгаалах салбарын төсвөө 7 хувиар нэмнэ

Маргааш (2017.03.05) Бүх Хятадын Ардын Төлөөлөгчдийн Их Хурлын 12 дахь удаагийн сонгуулийн тавдугаар чуулган эхэлж, энэ сарын 15-нд өндөрлөх юм байна. Тус чуулганы хэвлэлийн төлөөлөгч Фу өнөөдөр (2017.03.04) Хятад улс 2017 онд батлан хамгаалах салбарын төсвөө 7 хувиар нэмэгдүүлнэ гэж мэдэгдсэн байна. Тэрээр “Хятад Улсын эдийн засгийн хөгжил болон батлан хамгаалах салбарын хэрэгцээ зэргийг харгалзан үзсэний үндсэн дээр ийм шийдвэр гаргаж байгаа” гэжээ. Гэхдээ энэ салбарт яг хичнээн юань төсөвлөж байгааг хэлсэнгүй.

Тус улс 2016 онд  батлан хамгаалах салбарын төсвөө мөн л 7.6 хувиар нэмэгдүүсэн ба энэ нь 950 тэрбум юань байсан гэнэ. Үүнтэй харьцуулбал энэ онд тус салбарын төсөв 1 их наяд юаниас давах бололтой. 2017 оны нэмэгдэл бол Хятадын хувьд энэ салбарын төсвийг сүүлийн 10 гаруй жилийн хугацаанд хамгийн бага хувиар нэмсэн анхны тохиолдол аж.

НАТО-гийн гишүүн орнуудын батлан хамгаалах салбарын зардал нь хамгийн багадаа ДНБ-ий хоёр хувийг эзэлдэг бол Хятад Улсын энэ салбарын зардал ДНБ-ий ердөө 1.3 хувийг эзэлж байна гэж төлөөлөгч Фу хэлсэн байна.