Германы эрх баригчид тус улсад үйл ажиллагаа явуулдаг Оросын төрийн өмчит газрын тос, байгалийн хийн компаниуд болон тэдний охин компаниудын хөрөнгийг үндэсний болгох боломжид дүн шинжилгээ хийж байна гэж Handelsblatt сонин мэдээлэв.
Холбооны засгийн газар Германы хувьд системийн ач холбогдолтой эдгээр компаниудад хүндрэл учирсан тохиолдолд эрчим хүчний томоохон тасалдал үүсэх эрсдэлээс урьдчилан сэргийлэх бодолтой байна гэж сонин тэмдэглэжээ.
“Газпром Германиа” компани газар доорх хэд хэдэн томоохон хий хадгалах байгууламжийг ажиллуулдаг гэж Handelsblatt дуржээ. Мөн “Роснефть Дойчланд” бол Германы моторын түлшний зах зээлд гол тоглогч юм. Энэ хоёр компани хоёулаа Германы эрчим хүчний зах зээлд зайлшгүй шаардлагатай хэмээн Handelsblatt мэдээлжээ.
Үүний зэрэгцээ Европын холбооны түвшинд Европ дахь UGS операторуудыг заавал гэрчилгээжүүлэх саналыг идэвхтэй лоббидож байна. Европын комиссын үзэж байгаагаар хий хадгалах чухал дэд бүтцэд гадны нөлөөлөлтэй холбоотой болзошгүй эрсдэлээс зайлсхийхэд энэ арга хэмжээ туслах гэнэ. Мөн хэвлэлийн мэдээнд гэрчилгээгүй операторууд Европын холбооны хийн агуулахын эзэмшил, хяналтаас татгалзах ёстой тухай дурджээ.
Европын холбооны саналууд Герман, Австри улс дахь нийт 6 тэрбум шоо метр хэмжээтэй агуулахуудыг удирддаг Европ дахь хамгийн том операторуудын нэг болох Газпромын охин компанид ч хамаарч магадгүй байна.
Эх сурвалж: INTERFAX
