Д.Оюунхорол: Дамбын Хишигээгийн 500 га газар бий

Төрийн байгуулалт  болон Эдийн засгийн байнгын хорооны хамтарсан хуралдаанаар “Хөшигийн хөндийд эдийн засгийн чөлөөт бүс байгуулах тухай” УИХ-ын тогтоолын төслийг хэлэлцэж байна. Энэ үеэр УИХ-ын гишүүн Б.Энхбаяр бүтээн байгуулалт өрнөх “Хөшигийн хөндий” дэх газрын талаарх асуудал хөндсөнөө өөрийн цахим хуудсанаа хуудсанаа ийнхүү оруулжээ.

УИХ-ын гишүүн Б.Энхбаяр: Дамбын Хишигээ гэж нөхөр  Хөшигийн хөндийд маш том газар авсан. Эдийн засгийн чөлөөт бүс болонгуут энэ газраа улсад зарах гээд байна гэж ойлгосон. Энэ нөхөр хэдэн га газар авчхаад хэдэн төгрөгөөр улсад зарах гээд байна вэ.

 Д.Оюунхорол: Эдийн засгийн чөлөөт бүс байгуулах 31 мянган га газарт Дамбын Хишигээгийн 500 га газар бий. Гурван шатны шүүхийн шийдвэрээр тус аж ахуй нэгж 41 хэсэгт газар олголт хийсэн юм байна лээ. Шүүхээс газар маргаангүй, тус аж ахуй нэгжийг үйл ажиллагаа явуулах боломжтой гэсэн шийдвэрийг гаргасан байдаг. Бидэнтэй уулзаж энэ асуудлаа танилцуулсан. Өөрсдөө хэлэхдээ, Засгийн газраас гаргасан ерөнхий төлөвлөлттэй уялдуулж төлөвлөгөө гаргаж ажиллах боломжтой гэсэн.

УИХ-ын гишүүн Б.Энхбаяр: Дамбын Хишигээ аймгийн Засаг даргын шийдвэрээр газар аваад байдаг юм уу. Эсвэл Сэргэлэн сумын Засаг даргын шийдвэрээр авдаг юм уу. Мэдээлэлд ойр байдлаа ашиглаад газар авчихсан. Монгол улс бүтээн байгуулалтын ажлаа хийх гээд байдаг. Гэтэл энэ нөхөр улсын газрыг улсад нь зарах гээд байдаг. Ингээд шүүхээр өөртөө шийдвэр гаргуулдаг. Энэ хүн хэдэн төгрөгөөр газраа зарах гээд байдаг юм.

Д.Оюунхорол: Дамбын Хишигээ өөрөө хэлэхдээ, “Засгийн газар бодлогоороо төлөвлөлт хийгээд бүтээн байгуулалт хийвэл миний газрыг бүтэн авч болно” гэдэг. Гэхдээ надтай үнэ яриагүй. Өөрсдөө хот төлөвлөлтөд оролцоод явах хүсэлтэй. Мөн залуучуудын хот байгуулах аятайхан төсөлтэй байна лээ.