Москвад суугаа АНУ-ын цэргийн атташе ОХУ-ын хилийг зөрчсөн Америкийн шумбагч онгоцны асуудалтай холбоотой ноот бичиг хүлээн авчээ. Өнгөрсөн бямба гаригийн үүрээр Курилын арлын нутаг дэвсгэрт тэнгисийн цэргийн флотын сургуулилт хийхээр очсон Оросын байлдааны хөлөг онгоц АНУ-ын шумбагч онгоцыг ОХУ-ын усан хилээс албадан гаргажээ.
ОХУ-ын Батлан хамгаалах яамны мэдээлснээр, хэрэг явдал 2-р сарын 12-ны өглөөний 10:40 цагт Курилын гинжин хэлхээний Уруп арлын ойролцоо, ОХУ-ын усан хил дээр, Номхон далайн флотын цэргийн сургуулилт хийхээр төлөвлөж байсан хэсэгт болсон бөгөөд энд АНУ-ын тэнгисийн цэргийн Виржиниа ангиллын шумбагч онгоц хөвж явсан байна.
Оросын байлдааны хөлөг онгоц АНУ-ын шумбагч онгоцонд дохио өгч, Оросын нутаг дэвсгэрт байгааг анхааруулан усан дээр гарахыг шаардсан боловч Америкийн арми үүнийг үл тоомсорлосон учраас “Усан доорхи орчинд ОХУ-ын хилийг хамгаалах удирдамжийн дагуу Номхон далайн флотын фрегат маршал Шапошниковын баг зохих арга хэмжээг авсан” гэж Оросын Батлан хамгаалах яам мэдэгджээ.
ОХУ-ын Батлан хамгаалах яам “Олон улсын хууль тогтоомжийг бүдүүлгээр зөрчсөн Америкийн шумбагч онгоцны үйлдлийг АНУ-ын Батлан хамгаалах яамны төлөөлөгчд мэдэгдсэн” тухай мэдэгдээд АНУ-ын Тэнгисийн цэргийн хүчний “өдөөн хатгалага” нь үндэсний хэмжээнд заналхийлсэн гэж үзэж байгаагаа дурджээ.
