Донбассын оршин суугчдыг COVID-19 халдварын эсрэг Оросын “Спутник V” вакцинад хамруулахыг хүлээн зөвшөөрөхгүй хэмээн Украины Шадар сайд, Түр эзэлсэн нутаг дэвсгэрийг нийгэмшүүлэх асуудал эрхэлсэн сайд Ирина Верещук мэдэгджээ.
Украины Донбассын асуудлаарх Гурван талт холбоо бүлгийн төлөөлөгч Алексей Арестович өмнө нь хэлэхдээ, Оросын тал Украины шалган нэвтрүүлэх цэгийг нээхийн тулд өөрсдийгөө тунхагласан бүгд найрамдах улсуудад “Спутник V” вакцины гэрчилгээг хүлээн зөвшөөрөхийг шаардаж байгаа талаар мэдээлсэн юм.
Харин Верещук “Бид Оросын вакциныг хүлээн зөвшөөрөхгүй, бидэнд шалган нэвтрүүлэх цэг дээр иргэдээ вакцинжуулах боломж бий. Тэд ч бас ирж вакцин хийлгэж болно. “Спутник” болон “Спутник гэрлийг” таних тухай асуудал огт үнэ цэнэтэй зүйл биш” хэмээн лхагва гаригт хийсэн хэвлэлийн бага хурал дээр мэдэгджээ.
Киевийн шийдвэрээр 2015 онд Украины эрх баригчдын хяналтаас гадуур Донбассын нутаг дэвсгэрт нэвтрэх журам нэвтрүүлсэн байдаг. Энэхүү тээвэр, эдийн засгийн бүслэлт бүс нутгийг хүмүүнлэгийн сүйрэлд хүргэж байна гэж ЕАБХАБ-ын ажиглагчид мэдэгдэж байсан юм.
Харин Москва Киев Минскийн тохиролцоог биелүүлэхгүй байгаа бөгөөд мөргөлдөөнийг зохицуулах хэлэлцээрийг хойшлуулж байна хэмээн удаа дараа мэдэгдэж байгаа. Мөн Киев Украины зэвсэгт хүчний нийт бие бүрэлдэхүүний тал хувийг Донбасс руу илгээсэн гэж Оросын ГХЯ тэмдэглэжээ.
НАТО-гийн орнуудаас Оросын хил рүү цэргийн техник шилжүүлж, Донбасст барууны сургагч багш нарын тоог нэмэгдүүлж байгаад Москва санаа зовж байгаагаа мөн илэрхийлжээ. Барууны орнууд Украинд цэргийн тусламж үзүүлсээр байгаа бөгөөд тэр дундаа Донбасст хэрэглэж буй зэвсгийг нийлүүлсээр байгаа юм.
