Хэнтий аймгийн 18, Сонгинохайран дүүргийн 28 дугаар тойрогт явагдсан нөхөн сонгуулийн нэмэлт санал хураалт өглөө 07:00 цагаас эхэллээ. Санал хураалт 22:00 цаг хүртэл үргэлжилнэ. Аравдугаар сарын 10-нд явагдсан нөхөн сонгуулийн ирц Хэнтий аймагт 34.82 хувь, Сонгинохайрхан дүүрэгт 39.42 хувьтай өндөрлөсөн.
Нөхөн сонгуулийн урьдчилсан дүнгээр 28 дугаар тойрогт МАН-аас нэр дэвшигч Э.Батшугар 23313, ЗХЭЭ-ээс нэр дэвшигч Б.Найдалаа 5010, АН-аас нэр дэвшигч Э.Бат-Үүл 4740 санал авсан. Харин 18 дугаар тойрогт МАН-аас нэр дэвшигч Ц.Идэрбат 11741, АН-аас нэр дэвшигч Б.Гарамгайбаатар 3171 санал авсан байгаа.
УИХ-ын сонгуулийн 18 дугаар тойрог буюу Хэнтий аймгийн сонгогчдын нэрийн жагсаалтад бүртгэгдсэн үндсэн сонгогчийн тоо 50747 бол 28 дугаар тойрог буюу Сонгинохайрхан дүүрэгт бүртгэгдсэн үндсэн сонгогчийн тоо 113934 байдаг. Хоёр тойргийн нөхөн сонгуулийн санал хураалт 148 хэсгийн хороонд явагдсан бол нэмэлт санал хураалт 131 хэсэг дээр үргэлжилнэ.
Сонгуулийн ерөнхий хороо санал хураалттай холбоотойгоор уриалга гаргасныг хүргэж байна.
СОНГУУУЛИЙН ЕРӨНХИЙ ХОРООНЫ УРИАЛГА
Монголчууд бид төрт ёсоо дээдэлж, төрийн сонгуульдаа хүндэтгэлтэй хандаж, иргэний эрх, эрх чөлөөгөө эрхэмлэж ирсэн сайхан уламжлалтай ард түмэн. Иргэдийн улс төрийн сонгох, сонгогдох эрх нь хүний амьд явах эрхтэй агаар нэгтэй, ямар ч үед хязгаарлаж үл болох, үндсэн эрх юм.
Тиймээс тусгаар тогтносон, бүрэн эрхэт улсын сонгогч Та бүхэн хэнээс ч үл хамааран, бусдын нөлөөнд үл автан, айх айдасгүй, эргэлзэх эргэлзээгүйгээр сонгуульдаа идэвхтэй оролцож, төрд илгээх өөрийн төлөөллийг сонгоно уу.
Сонгуулийн үйл ажиллагааг хуулийн хүрээнд ил тод, нээлттэй, шударга, хүндрэл чирэгдэлгүй явуулахын тулд сонгуулийн байгууллагын зүгээс шаардлагатай бүх арга хэмжээг авч ажиллахаа илэрхийлж байна.
Монгол Улсын Их Хурлын сонгуулийн тухай хуулийн 78 дугаар зүйлд заасны дагуу Улсын Их Хурлын 18, 28 дугаар тойргийн нөхөн сонгуулийн нэмэлт санал хураалт 2021 оны 10 дугаар сарын 16-ны бямба гарагт 07:00-22:00 цагт явагдана.
Нэмэлт санал хураалтын ирцийн мэдээг https://turnout.gec.gov.mn/ цахим хуудсаар нийтэд нээлттэй байршуулж, санал авах 131 хэсэгт сонгогч саналаа бусдаас хараат бусаар, аюулгүй нөхцөл байдалд өгөх боломжийг бүрдүүлж, санал авах бүхий л үйл явцыг дүрс бичлэгээр баримтжуулж, хяналт тавьж, Сонгуулийн байгууллагад хамаарах зөрчил, дутагдлыг нэн даруй засч залруулж, шуурхай ажиллах болно.
Нөхөн сонгуулийн нэмэлт санал хураалт Улсын Их Хурлын 18 дугаар тойргийн 73 хэсэг /Хэнтий аймгийн Хэрлэн, Дадал, Дархан, Баян-Адарга, Дэлгэрхаан, Галшар, Биндэр, Мөрөн, Бор-Өндөр, Батноров, Цэнхэрмандал, Норовлин, Баянмөнх-1, 2-р баг, Батширээт, Баянхутаг, Өмнөдэлгэр сум/-т, Улсын Их Хурлын 28 дугаар тойргийн 58 хэсэг /нийслэлийн Сонгинохайрхан дүүргийн 7, 8, 9, 10, 11, 12, 13, 14, 15, 16, 17, 18, 19, 21, 23, 25, 27, 28, 29, 30, 31, 38, 39, 40, 42, 43 дугаар хороо/-т болох тул эхний санал хураалтад оролцоогүй сонгогч Та бүхнийг хүрэлцэн ирж, саналаа өгөхийг уриалж байна.
Сонгогч Таны санал чухал.
МОНГОЛ УЛСЫН СОНГУУЛИЙН ЕРӨНХИЙ ХОРОО
ХЭНТИЙ АЙМГИЙН СОНГУУЛИЙН ХОРОО
НИЙСЛЭЛИЙН СОНГУУЛИЙН ХОРОО
