Үндэсний аудитын газар (ҮАГ)-аас 15 нам, 4 эвслийн УИХ-ын 2020 оны сонгуульд оролцохоор дэвшүүлсэн мөрийн хөтөлбөрийн дүгнэлтийг гаргажээ. Үүнээс 7 намын мөрийн хөтөлбөр хуульд нийцсэн бол бусдыг нь хуульд нийцээгүй гэсэн дүгнэлт гарсныг ҮАГ-ын орлогч дарга О.Тэнгис мэдээлэв.
УИХ-ын сонгуулийн тухай хуулийн дагуу сонгуульд оролцох нам, эвслийн мөрийн хөтөлбөр нь Монгол улсын төвийн тогтвортой байдлын тухай болон Монгол Улсын урт хугацааны хөгжлийнбодлогод нийцсэн байх ёстой.
Тодруулбал, мөнгө, эд хөрөнгө амлах, үнэгүй болон хямдруулсан үнээр үйлчлэх, улс, орон нутгийн салбарын орлогыг бусдад хандивлах, уул уурхайн салбарын орлогыг хишиг, хувь болгож хуваарилах зэргийг хуулиар хориглодог. Дээрх хуулийн шаардлагыг хангаагүй 12 нам, эвслийн мөрийн хөтөлбөрийг буцаасан бөгөөд тав хоногийн дотор хуульд нийцүүлж, ҮАГ-т дахин ирүүлэх боломжтойг ҮАГ-ын орлогч дарга О.Тэнгис онцолсон юм.
Тухайлбал, цалинг 2-5 сая төгрөгт хүргэх нам, эвслүүдийн нийтлэг амлалт нь төсвийн зарлагыг их хэмжээгээр нэмэхээр байна. Мөн орон сууцанд үнэгүй оруулах, арилжааны банкны зээлийг хүүгүй болгох зэрэг амлалт хууль зөрчиж байна хэмээн ҮАГ үзжээ.
Мөрийн хөтөлбөр нь хуульд нийцсэн нам:
Зон олны нам
Хөгжлийн хөтөлбөр нам
Дэлхийн монголчуудын нам
Эрх чөлөөг хэрэгжүүлэгч нам
Эх орон нам
Ард түмний олонхын засаглал нам
Ард түмний нам