Итали Улсын Иргэний хамгаалалтын газраас хийсэн албан ёсны мэдээллээр 3 дугаар сарын 15-ны 18:00 цагийн байдлаар тус улсад коронавирусын халдвар гарснаас хойш нийт 24747 тохиолдол бүртгэгдэж, 2335 хүн бүрэн эдгэрч, 1809 хүн нас бараад байна.
Монгол Улсын Онцгой комиссын шийдвэрээр олон улсын бүх нислэгийг түр хугацаанд зогсоосон. Үүнтэй холбоотойгоор манай Засгийн газар европын орнуудад түр хугацаагаар зорчиж яваад нутаг буцах боломжгүй болсон иргэдээ өргөдөл, хүсэлтийг нь үндэслэн 3 дугаар сарын 15-ны өдөр Берлин, Москва хотуудаар дамжуулан татсан тул ойрын хугацаанд дахин нислэг төлөвлөөгүй байна. Иймд Итали Улсад оршин суугаа Монгол Улсын иргэд маань тус улсын Засгийн газраас өгч буй зөвлөмжийн дагуу гадуур явах хөдөлгөөнөө бүрэн хязгаарлаж, орон байрандаа өөрийгөө аль болох тусгаарлан амны хаалт зүүх, гарын ариун цэврийг сахихыг онцгойлон зөвлөж байна.
Хэрэв танд өндөр хэмээр халуурах, хоолой өвдөх болон бусад шинж тэмдэг илэрвэл Эрүүл мэндийн яамны 1500 /итали, англи, хятад хэлээр/ 112 гэсэн тусгай дугаараар утсаар холбогдон мэдээлэл, зөвлөгөө шуурхай авах боломжтой.
Италийн Засгийн газраас оршин суух зөвшөөрлийн сунгалт хийх журамдаа түр хугацаанд өөрчлөлт оруулаад байна. Тухайлбал, оршин суух зөвшөөрөл сунгах хүсэлтийг хугацаа дууссанаас хойш 60 хоногийн хугацаанд гаргах ёстой байсан бол энэ хугацааг 90 хоног болгон сунгасан байна. Иймд манай иргэд Италийн Засгийн газраас улс орон даяар хөл хорио тогтоосонтой уялдуулан шаардлагатай бол оршин суух зөвшөөрлийн сунгалтын хүсэлтээ дурдсан хугацаанд оршин суугаа газрын эрх бүхий байгууллага /Questura/-д гаргана уу.
Шаардлагатай тохиолдолд Элчин сайдын яамны шуурхай утас (+39 389 063 4886), Mongolian Embassy Italy фэйсбүүк хуудас болон http://monembrome.mn/ сайтаас зөвлөгөө мэдээлэл авна уу.
http://monembrome.mn/index.php?moduls=101&id=174
Монгол Улсаас Бүгд Найрамдах Итали Улсад суугаа
Элчин сайдын яам
Ром хот
