Нийслэлийн Цагдаагийн газрын Мөрдөн шалгах газрын Хулгайлах гэмт хэрэгтэй тэмцэх хэлтсийн алба хаагчид өчигдөр буюу 2020/01/14-ний өдөр орон байрны хулгай хийдэг бүлэг этгээдийг илрүүлжээ.
Тэдний дунд 13 настай хүүхэд гэмт хэрэгт оролцсон нь мөрдөн шалгах ажиллагааны явцад тогтоогдсон байна.
Энэ талаар Цагдаагийн ерөнхий газрын Хэвлэлийн төлөөлөгч, цагдаагийн ахмад М.Мөнхшүр хэлэхдээ
“13 настай “М” гэгч бусадтай хамтран 2019 оноос эхлэн хулгайн гэмт хэрэг хийдэг байснаа мэдүүлсэн. Түүний 60 удаагийн үйлдэл нь урьдчилсан байдлаар тогтоогдсон бөгөөд мөрдөн шалгах ажиллагаа үргэлжилж байна.
Сурагчдын амралт үргэлжилж буй энэ хугацаанд эцэг, эхчүүд хүүхдэдээ тавих анхаарал, хяналтаа сайжруулах хэрэгтэй. 13 настай М гэгч хүү хичээлээ тарсан үедээ, эсвэл хичээлээ таслаад хулгай хийдэг гэж мэдүүлсэн” гэлээ.
Тэд орон байрнаас хулгайлсан эд зүйлс нь ихэвчлэн бэлэн мөнгө, үнэт эдлэл, зурагт зэрэг бөгөөд тэдгээрийгээ барьцаалан зээлдүүлэх төв, зах, худалдааны төвөөр худалдаалсан гэдгээ М хүү хэлсэн байна.
