2024 оны эхний 8 сард зэс экспорт Монголын нийт экспортын 44 хувийг бүрдүүлжээ

Монгол Улсын гадаад худалдааны нийт бараа эргэлт 2024 оны эхний найман сард 22.8 тэрбум ам.долларт хүрч, өмнөх оны мөн үеэс 36.8 хувиар нэмэгдсэн байна. Энэ хугацаанд экспорт 57.2 хувиар өсөж 14.4 тэрбум ам.доллар болсон бол импорт 12 хувиар нэмэгдэж, 8.4 тэрбум ам.долларт хүрээд байна. Үүний үр дүнд гадаад худалдааны тэнцэл 6 тэрбум ам.долларын ашигтай гарчээ.

Монгол Улс нийт экспортын 92.5 хувийг Их Хаант Хятад улсад нийлүүлсэн байна. Импортын бараа материалын 40.7 хувийг Хятадаас, 27.5 хувийг ОХУ-аас импортолсон байна.

Экспортын орлогын 43.7 хувь буюу 6.3 тэрбум ам.долларыг зэсийн хүдэр болон баяжмалын экспорт бүрдүүлсэн байна. Мөн тайлант хугацаанд 74.4 сая тонн чулуун нүүрсийг 5.3 тэрбум ам.доллароор экспортолсон нь биет хэмжээгээр өмнөх оныхоос 50 орчим хувиар өссөн үзүүлэлт болсон байна. Харин алт болон боловсруулаагүй нефтийн экспорт тус хугацаанд 1.9-6.9 хувиар буурсан байна.

Хөдөө аж ахуйн гаралтай бүтээгдэхүүнээс ямааны самнасан ноолуурын экспорт 46.9 хувиар өссөн бол малын мах, дайвар бүтээгдэхүүний экспорт 17.9 хувиар буурсан байна.

Нийт 8.4 тэрбум ам.долларын импортын 22 хувь нь нефтийн бүтээгдэхүүн эзэлж байна. Автобензин болон дизель түлшний импорт өссөн бол суудлын болон ачааны автомашины импорт буурчээ. Мөн улаанбуудай, хүнсний ногоо, жимс, элсэн чихрийн импорт нэмэгдсэн байна.