Прокурорын байгууллага 2026 онд авлигын 140 хэргийг шүүхэд шилжүүлжээ
Энэхүү мэдээлэл нь иргэдийг гэмт хэрэг, зөрчлөөс урьдчилан сэргийлэх, Эрүүгийн хуульд заасан гэмт хэргийн талаарх ойлголт, хэргийн шийдвэрлэлтийг олон нийтэд ойлгомжтой байдлаар хүргэх зорилготой.
Прокурорын байгууллага 2026 оны эхнээс Эрүүгийн хуулийн 22 дугаар бүлэгт заасан авлигын 140 хэрэгт яллах дүгнэлт үйлдэж, шүүхэд шилжүүлжээ.
Нийслэл болон Өвөрхангай аймгийн прокурорын газраас 2026 оны 6 дугаар сарын 15-19-ний өдрүүдэд хахууль авах, өгөх, эрх мэдэл, албан тушаалын байдлаа урвуулан ашиглах, үндэслэлгүй хөрөнгөжсөн, мөнгө угаасан гэмт хэрэгт холбогдсон 9 хүнд холбогдох 5 хэргийг анхан шатны шүүхээр хянан шийдвэрлүүлсэн байна.
Шүүхээс 9 хүнийг авлигын гэмт хэрэг үйлдсэн гэм буруутайд тооцож, 2 жилээс 6 жил 9 сарын хорих ял, зорчих эрхийг хязгаарлах, торгох ял оногдуулсан бөгөөд нэг хүнийг хөөн хэлэлцэх хугацаа дууссан үндэслэлээр эрүүгийн хариуцлагаас чөлөөлжээ.
Нийслэлийн прокурорын газраас Ц.Д нь “Эрдэнэт үйлдвэр” ТӨҮГ-ын ерөнхий захирлаар ажиллаж байхдаа эрх мэдэл, албан тушаалын байдлаа урвуулан ашиглаж, 2015 онд тус үйлдвэрийн зөвлөлийн зөвшөөрөлгүйгээр ашиггүй гэрээ байгуулж, 138 тэрбум төгрөгийн орлого олох боломжийг алдагдуулсан гэж буруутгагдаж байна.
Мөн Ц.Д нь “Эрдэнэт Медикал” эмнэлгийг 64 тэрбум төгрөгийн үнэлгээтэйгээр хууль бусаар шилжүүлсэн, 461 мянган америк долларыг үндэслэлгүй хөрөнгөжсөн, мөнгө угаасан хэрэгт холбогдсон.
Шүүх Ц.Д-г нийтийн албан тушаалтан албаны эрх мэдлээ урвуулан ашигласан, үндэслэлгүй хөрөнгөжсөн, мөнгө угаасан гэмт хэрэгт буруутайд тооцож, нийтийн албанд ажиллах эрхийг 7 жилээр хасаж, 6 жил 9 сарын хорих ял оногдуулсан юм.
Б.Г нь Дархан-Уул аймгийн Онцгой байдлын газрын албан тушаалтан байхад албан тушаалын байдлаа урвуулан ашиглаж, улаан буудайн үрийг хууль бусаар олгож, улсад 101,4 сая төгрөгийн хохирол учруулсан хэрэгт яллагдсан.
Шүүх Б.Г-г нийтийн албанд ажиллах эрхийг 4 жилээр хасаж, зорчих эрхийг 3 жилээр хязгаарлах ял оногдуулсан бөгөөд Ц.А-г мөн буруутайд тооцож, нийтийн албанд ажиллах эрхийг 2 жилээр хасаж, зорчих эрхийг 1 жил 6 сарын хугацаагаар хязгаарласан байна.
Б.Б нь орон сууцны гэрчилгээг хурдан хугацаанд гаргуулахын тулд хахууль өгсөн хэрэгт яллагдаж, шүүхээс нийтийн албанд ажиллах эрхийг 2 жилээр хасаж, торгууль ногдуулжээ.
Өвөрхангай аймгийн прокурорын газраас Г.С нь Уянга сумын ИТХ-ын даргаар ажиллаж байхдаа албаны эрх мэдлээ урвуулан ашиглан илүү цалин авсан хэрэгт яллагдсан.
Шүүхээс Г.С-ийг нийтийн албанд ажиллах эрхийг 2 жил 3 сараар хасаж, зорчих эрхийг 1 жил 3 сарын хугацаагаар хязгаарлах ял оногдуулсан бөгөөд П.О-г мөн буруутайд тооцож, нийтийн албанд ажиллах эрхийг 2 жилээр хасаж, зорчих эрхийг 1 жил 1 сарын хугацаагаар хязгаарласан байна.
Эх сурвалж: Улсын Ерөнхий Прокурорын газар