ХӨСҮТ: Улаанбурхан өвчний тархалт нэмэгдэж, дархлаажуулалт чухал байна

Халдварт Өвчин Судлалын Үндэсний Төв (ХӨСҮТ)-өөс улаанбурхан өвчин өдөрт дунджаар 14 тохиолдлоор бүртгэгдэж байгааг мэдээллээ. Улаанбурхан нь хурдан тархдаг, аюултай халдварт өвчин бөгөөд дархлаажуулалтад хамрагдах нь өвчнөөс сэргийлэх гол арга юм.

Дархлаажуулалтад хамрагдаагүй хүмүүс халдвар авч, бусдад дамжуулах эрсдэлтэй байдаг бөгөөд энэ нь хамгийн эмзэг бүлэг болох нярай хүүхдүүдийн өвчлөл, хүндрэл, амь насанд хүрэх эрсдлийг нэмэгдүүлдэг. Тухайлбал, улаанбурхан өвчний улмаас нас барж буй хүүхдүүдийн 90 орчим хувь нь вакцин хийлгэх насанд хүрээгүй, нэг хүртэлх насны нярай хүүхдүүд байдаг.

Иймээс ХӨСҮТ-өөс улаанбурханы вакциндаа бүрэн хамрагдах, хүүхдийн товлолт вакциныг хоцроолгүй хийлгэх, дутуу вакциныг нөхөн дархлаажуулалтад хамруулахыг зөвлөж байна. Эдгээр энгийн алхмууд нь нярай хүүхдийн амь насыг хамгаалахад чухал хамгаалалт болдог.