Эрүүл мэндийн сайд Э.Батшугар даатгалын тогтолцооны шинэчлэлд анхаарч байна

Эрүүл мэндийн салбарт тулгамдсан асуудлуудын нэг нь даатгалын тогтолцоо юм. Энэ талаар Эрүүл мэндийн сайд Э.Батшугар сүүлийн дөрвөн өдөр даатгалын сангийн асуудалд онцгой анхаарал хандуулсан талаар мэдээлэл өглөө.

Тэрбээр даатгалын сангийн хэмжээ 2.4 их наяд төгрөгийн том систем бөгөөд 700 бүлэг онош, 15 мянган өвчин, 669 хөнгөлөлттэй эм даатгалд хамрагддаг гэж тодорхойлсон байна. Иргэдэд энэ сангийн нөөцийг хэрхэн зөв хуваарилах нь чухал бөгөөд хаана алдаа гарч, илүү зардал гарч байгааг тодорхойлоход компьютерийн системийг ашиглаж байгаа гэв.

Мөн анхан шатны эмнэлэгт очсон хүний онош лавлагаа шатлалд шууд илгээгдэх ёстой бөгөөд өвчний түүхийг гар аргаар тэмдэглэх уламжлалт аргыг халж, цахимжуулалт хийх шаардлагатайг онцлов. Цахимжуулалт нь хяналтыг сайжруулж, иргэд эмнэлэгт дугаарлах шаардлагагүй болох боломжийг бүрдүүлэх юм.