Ерөнхийлөгч У.Хүрэлсүхийн Гал морин жилийн сар шинийн мэндчилгээ

Монгол Улсын Ерөнхийлөгч Ухнаагийн Хүрэлсүх XVII жарны Гал морин жилийн сар шинийн баярын мэндчилгээг ард иргэдэдээ хүргэлээ. Тэрбээр Монголын цагаан сар нь Хүннү гүрний үеэс уламжлагдан ирсэн, монголчуудын тусгаар тогтнол, соёл, зан заншлын бэлгэдэл болохыг онцлов.

Ерөнхийлөгч Хүрэлсүх Модон могой жилд Монгол Улсын хүн ам гурван сая 592 мянгад хүрсэн, мал сүрэг 60 сая, үр тарианы ургац 745 мянган тонн болсон талаар мэдээлэв. Мөн эдийн засаг зургаан хувиар өсч, нэг хүнд ногдох ДНБ 7,000 ам.долларт хүрсэн, гадаад валютын нөөц зургаан тэрбум ам.доллар болсон нь түүхэн дээд үзүүлэлт гэж тэмдэглэв.

Тэрбээр Могой жилд гадаад бодлого, харилцаа өргөжиж, олон улсын тавцанд Монгол Улсын нэр хүнд өссөн, эрдэмтэн, залуус, урлаг спортынхон эх орныхоо нэр хүндийг өндөрт өргөсөн жил байсныг дурдав.

Ерөнхийлөгч Чингис хааны алдар гавьяаг дээдэлж, түүний музейг байгуулах, Хархорум хотыг сэргээн засварлах, монгол түүхийн иж бүрэн 30 боть ном бүтээх зэрэг зарлиг гаргаснаа мэдэгдэв. Мөн НҮБ-ын Ерөнхий Ассамблей “Дэлхийн адууны өдөр”-ийг баталсан талаар онцлов.

Ирэх Гал морин жилд Их Монгол Улсын 820 жилийн ой тохиож, Чингис хаанд “Чингис” цол олгож, Хар Зүрх уулыг төрийн тахилгатай болгох зарлиг гаргасан байна. Хөвсгөл нуурыг төрийн тахилгатай нуур болгосон нь Монголын түүхэнд анх удаа тохиож буй үйл явдал гэдгийг онцоллоо.

Ерөнхийлөгч Хүрэлсүх ирэх жилд улс орон, ард түмэн эв нэгдэлтэйгээр хөгжиж, уламжлалаа дээдэлж, амжилтаа бататгахыг уриаллаа. Тэрбээр Гал морин жилийн сар шинийн мэндчилгээндээ монгол түмний энх тунх, залуусын цог жавхаа, хүүхэд багачуудын сэргэлэн цовоо, төрийн төвшин, дэлхийн амгаланг ерөөв.