Ерөнхий сайд Г.Занданшатар байгалийн баялгийн өгөөжийг ард түмэнд шударгаар хүртээх тохиролцоонд гарын үсэг зурлаа

Ерөнхий сайд Г.Занданшатар Ухаа худаг, Нарийнсухайт, Барууннаран болон Эрдэнэтийн үүсмэл ордод хэрэгжиж буй төслүүдийн өгөөжийн 60 хувийг Монголын ард түмэнд хүртээх урьдчилсан тохиролцоонд төр, хувийн хэвшлийн талууд гарын үсэг зурсныг мэдэгдлээ.

Энэхүү тохиролцоо нь Үндсэн хуулийн 6.2-т заасан “газрын хэвлийн баялгийн өгөөжийн дийлэнх нь ард түмэнд ногдоно” гэсэн зарчмыг бодитоор хэрэгжүүлэх эхлэл болж байна.

Байгалийн баялгийн орлогыг Үндэсний баялгийн санд төвлөрүүлж, хүний хөгжил, эрүүл аюулгүй орчинд амьдрах үндсэн эрхийг хангахад зориулах тогтвортой санхүүгийн суурь бүрдүүлэх зорилготой юм.

Төр, хувийн хэвшлийн хамтын ажиллагаа нь улс орны тогтвортой хөгжлийн гол тулгуур бөгөөд хувийн хэвшлийн оролцоог үнэлж, хамтын шийдэлд хүрэхэд идэвхтэй оролцсон талуудад талархал илэрхийлэв.

Энэхүү шийдвэр нь нэг удаагийн бус, баялгийг Монголдоо нэмүү өртөг шингээсэн бүтээгдэхүүн болгох, ажлын байр бий болгох, иргэдэд өгөөжийг шударгаар хүртээх урт хугацааны бодлогын эхлэл юм.

Монгол Улс баялгаа зөв удирдаж чадвал баялагтай орон төдийгүй баялгаа иргэддээ шударгаар хүртээдэг улс болох боломжтой гэдгийг онцлов.